18 сәуір күні Орал қалалық сотында ашық сот отырысы өтіп, пробация қызметінің есебінде тұрған азаматтың ісі қаралды.
Сот отырысына Орал қалалық пробация қызметінің қызметкерлері, есептегi сотталғандар, сонымен қатар БАҚ өкілдері қатысты.
Сот талқылауы барысында жауапқа тартылған 1988 жылы туған А. есiмдi азаматқа қатысты бас бостандығын шектеу түріндегі жаза мерзімінің өтелмеген бөлігін бас бостандығынан айыру түріндегі жазамен ауыстыру туралы ұсыныс қаралды. Пробация қызметінің есебінде тұрған азамат бас бостандығын шектеу түріндегі жазаны өтеу кезінде бірқатар бұзушылықтарға жол берген. Нәтижесінде Орал қалалық сотының қаулысымен өтелмеген жазасы бас бостандығынан айыру жазасына ауыстырылды. Әзірге қаулы заңды күшіне енген жоқ. — «Тәртіпке бағынған құл болмайды» деп бас қолбасшы Бауыржан Момышұлы атамыз айткандай, есептегi азаматтарды заңды сактауғa және тәртіп бұзбауға шақырамыз, — деді БҚО қылмыстық-атқару жүйесі департаментінің пробация қызметіне басшылық ету бөлімінің инспекторы, әділет аға лейтенанты Серік Джумагазиев.
Жалпы жыл басынан бері Батыс Қазақстан облысы бойынша пробация қызметінің есебінде тұрған 33 сотталғанға катысты осындай жазалар тағайындалған. Яғни, бас бостандығын шектеу жазасын өтеу барысында заң бұзушылықтарға жол берген жағдайда жазаның өтелмеген бөлiгi сот қаулысымен бас бостандығынан айыру жазаcына ауыстырылған.
