«Хабар 24»: «Таулы Қарабақта Әзербайжан мен армян күштері тағы қақтығысып, бірнеше жауынгер қаза тапты. Әскери қимылдар Лачин ауданында болды», – деп хабарлайды. Әзербайжан тарапының мәлімдеуінше, ұрыс танылмаған Таулы Қарабақ Республикасы күштерінің Әзербайжан жасақтары бекінісін атқылауынан басталған. Шабуылдан бір сарбаз қаза тапты. Әзербайжан тарапы қарымта жауап ретінде қарсы жақтың 2 жауынгерін мерт қылып, 14-ін жаралаған. Бірқатар жотаны бақылауына алған. Танылмаған Таулы Қарабақ Республикасы жартылай мобилизациялау жариялады. Еске сала кетсек, 2020 жылы қыркүйек айында Таулы Қарабақта жағдай қайта шиеленісіп, екі ел арасында соғыс болған еді. Әскери қимылдар қараша айында Армения, Әзербайжан және Ресейдің үшжақты келісімге қол қоюымен аяқталып, Баку Шуша қаласы мен тағы бірнеше ауданды өзіне қайтарып алған-ды.
