Тоқаев Фейсал бен Фархан Әл Саудты қабылдады

   Мемлекет басшысы Қазақстанға ресми сапармен келген Сауд Арабиясы Корольдігінің Сыртқы істер министрі Фейсал бен Фархан Әл Саудты қабылдады.  Кездесу барысында саяси, сауда-экономикалық, инвестициялық және мәдени-гуманитарлық ынтымақтастықты нығайтуға баса мән бере отырып, Қазақстан мен Сауд Арабиясы арасындағы қатынастарды дамытудың перспективалары талқыланды. Қасым-Жомарт Тоқаев: «Сауд Арабиясы — Қазақстанның араб және ислам әлеміндегі басты серіктесінің бірі.  Елдеріміз ортақ құндылықтарға негізделген саяси диалогты достық пен өзара сенім рухында дәйекті түрде дамыта береді. Екі қасиеттінің Сақтаушысы Король Салман бен Әбдел Әзизбен және Тақ мұрагері Мұхаммед бен Салманмен арадағы табысты ынтымақтастықты одан әрі жалғастыруға дайын екенімізді білдіремін», – деп, Қазақстан мен Сауд Арабиясының үкіметаралық комиссиясы мен Іскерлік кеңестің жұмысын жандандыру маңызды екеніне тоқталды. Сондай-ақ тиісті келіссөздерді жүргізу үшін өкілетті үкіметтік делегацияны Эр-Риядқа жіберуге дайын екенін айтты. Министр Екі мемлекет арасындағы қарым-қатынастардың дәйекті түрде дамып келе жатқанын атап өтіп, Корольдік басшылығының дипломатиялық байланыстар орнағаннан бергі жан-жақты ынтымақтастық бағыттағы жетістіктерді жоғары бағалайтынын айтқан Саудиялық дипломат: «Сізді елде референдумның табысты өтуімен құттықтаймын. Сауд Арабиясы Корольдігі Сіздің басшылығыңызбен Екінші Республиканы құру ісінде және Қазақстанның одан әрі өркендеуіне бағытталған ауқымды реформаларды жүзеге асыруды жалғастыруда табыс тілейді», – деді Біз сауда-экономикалық және инвестициялық ықпалдастықты нығайтудың перспективаларын егжей-тегжейлі талқылау үшін қазақстандық серіктестермен кездесу ұйымдастыруға дайынбыз.  Бұл жуық арада Қазақстанда жоғары деңгейдегі кездесу өткізу үшін берік негіз болады»,— деді.