Сілтемесі: https://www.youtube.com/watch?v=UqdbuKgbFeg
Түркі халықтарының рухани әлемі мен тарихи бірлігін бейнелейтін TurkDiscovery платформасы өз ағартушылық миссиясын YouTube арқылы кеңейтуде. Платформа көрермендерге түркі рухының мәңгілік іздерін таныстырып, ұрпақтар арасындағы көпір қызметін атқаруда.
Түркі мәдениеті және мұрасы қорының ағартушылық қызметі аясында «Мәңгілік іздер: Түркі әлемі таңбаларда» атты деректі фильм түсіріліп, оның алғашқы бөлімі жарық көрді.
Жобаның негізгі мақсаты – түркі әлемінің кең аумағында таралған петроглифтер, таңбалар және руникалық әліпбилер арқылы ортақ тарихи жадты көрнекі түрде көрсету. Фильм мыңжылдықтардың тынысын сақтаған киелі мекендер мен тасқа қашалған болмыс белгілері туралы баяндайды.
Фильмнің алғашқы бөлімі Каспий теңізі жағалауынан бастап Әзербайжанның Қарабах жазығына дейінгі кең аумақтағы түркі мұрасының ғылыми әрі мәдени көрінісін жаңғыртады. Әртүрлі көне орындарда жүргізілген түсірілімдер түркі халықтарының өзіндік «төлқұжаты» саналатын таңбалардың құпиясын ашады.
Фильмде сарапшылардың қатысуымен тасқа қашалған түркі тайпаларының (қайы, афшарлар, селжұқтар, қыпшақтар және т.б.) символдарына қатысты маңызды тақырыптар жан-жақты түсіндіріледі. Жоба сондай-ақ Әзербайжан аумағындағы көне петроглифтер, қорғандар және тас балбалдар Алтайдан Анадолыға дейін созылған ұлы түркі әлемінің біртұтас мәдени кодының ажырамас бөлігі екенін дәлелдейді.
