Өткен аптаның сенбісі күні мемлекеттік телеарнада сөз сөйлеген Түркіменстан президенті Құрбанғұлы Бердімұхамедов мамандарға «Тозақ қақпасы» деп аталатын газ кратеріндегі өртті сөндіру жолын табуды тапсырып: «Қарақұм шөліндегі бұл өрт – қоршаған орта мен жақын маңда тұратын адамдар өміріне қауіп төндіреді. Сондай-ақ, біз халықтың жағдайын жақсартып, пайда таба алатын табиғи қордан айырылып жатырмыз», – деді. Бердімұхамедов мамандардан өртті сөндіру жолын табуды алғаш рет 2010 жылы талап еткен. Бұл жолы президент вице-премьер Шахым Әбдрахмановқа шетелдік мамандарды тарта отырып өртті сөндіруді тапсырыпты.
Еске салсақ, «Тозақ қақпасындағы» өрт 1971 жылы басталған. Ұңғыма қазу кезінде топырақтың беткі қабаты жер асты үңгіріне түсіп, газ толы алып шұңқыр пайда болған. Геологтар уақыт өте сөнеді деген сеніммен газды өртеген. Алайда газ әлі де жануда. Кратердің ұзындығы 70 метр, тереңдігі 20 метр. Ол Ашхабадтың солтүстігіндегі Қарақұм шөлінде, Дарваза ауылының жанында орналасқан. Кратер Түркіменстандағы туристер келетін негізгі орынға айналды. Ал 2018 жылдан бастап атауы «Қарақұм сәулесі» деп өзгертілген.
