Табиғатты аялау, онымен етене байланыста өмір сүру дағдысын қалыптастыру – бала жастан бойға сіңіру қажет асыл қасиеттердің бірі.
Табиғатты аялай білген адамнан өзге ешқандай жамандық күтуге болмайды. Міне, Түркістан Оқушылар сарайы мен «Turkistan Tourism Center» орталығы бірлесе ұйымдастырған «Бұл – біздің таулар» атты фестивальдің басты мақсаты осы. 20 жылдан бері тұрақты түрде ұйымдастырылып келе жатқан бұл шараның тау туризмін дамытуға қосатын үлесі өз алдына бөлек әңгіме.
Фестивальға Түркістан қаласындағы 30 мектептің үздік, белсенді әрі талантты деген 30 оқушысы мен «Оқушылар сарайындағы» үйірмелерге қатысушы, көптеген республикалық және халықаралық додаларда топ жарып жүрген дарынды 20 оқушы қатысты. Олар Сайрам-Өгем мемлекеттік ұлттық табиғи паркі және Хантағы демалыс аумағына саяхат жасап, түрлі қызықты сайыстар мен ойындарға қатысты.
«Алдымен Түркістан қаласынан жолға шыққан фестиваль қатысушылары Сайрам-Өгем мемлекеттік ұлттық табиғи паркіне барды. Онда оқушылар «Бұл – біздің таулар» тақырыбында сурет салудан сынға түссе, одан кейін «Дрон ұшыру» бойынша балалар өздерінің қабілеттерін көрсетті. Сонымен қатар өнерден құралақан емес балалар өлең, эссе жазып, ән айтып, өзге де таланттарын көрсету арқылы ұйымдастырушылардың жүлделеріне ие болды. Ал, екінші күні Хантағы демалыс аумағына барған балалар кедергілер арқылы тау шыңдарын бағындырды. Сондай-ақ пікірсайыс ұйымдастырып, өздерінің жан-жақтылықтарын көрсете білді», – деп хабарлайды облыс әкімінің баспасөз қызметі.
Бұл іс-шараның маңызы өте зор болғанын жоққа шығаруға болмайды. Фестивальға қатысты өз ойын Оқушылар сарайының директоры Индира Сарқытқызы былай деп түйіндейді: «Балаларды табиғатқа жиі алып бару, оларға қызықты сәттер сыйлау өте пайдалы. Мен өзім де тауға жиі шығамын. Адам табиғатпен тілдесу арқылы жаңа белестерге күш-қуат алады. Сонымен қатар, бүгінгі шара ең бірінші кезекте балаларды табиғатты аялауға үйретері сөзсіз».
