Ақтауда «Қазақстан мәслихаттары депутаттарының бірлестігі» республикалық қоғамдық бірлестігінің көшпелі отырысы өтті. Жиынға Маңғыстау облысының әкімі Нұрлан Ноғаев, «Қазақстан мәслихаттары депутаттарының бірлестігі» РҚБ төрағасы Төлеубек Мұқашев, еліміздің барлық облыстары мен республикалық маңызы бар қалалар мәслихаттарының хатшылары, Маңғыстау облыстық мәслихатының депутаттары, сондай-ақ қалалық және аудандық мәслихаттардың хатшылары қатысты.
Өңірлердің дербестігін кеңейту мақсатында «Қазақстан Республикасындағы жергілікті өзін-өзі басқару туралы» жаңа заң әзірленуде. Осы үдеріске барлық өңірлердегі азаматтық қоғам өкілдерін жұмылдыру көзделген. Басты міндет – жергілікті өзін-өзі басқару органдарының өкілеттіктерін кеңейту, басқару үдерістерін қағазбастылықтан арылту және олардың қаржылық дербестігін нығайту. Барлық механизм жергілікті атқарушы органдар мен өзін-өзі басқару органдары жұмысының тиімділігін арттыруға бағытталады. Аталған заң жобасын Мәжіліске 2023 жылы енгізу жоспарланып отыр.
Жиында сөз алған аймақ басшысы аталған заң жобасының халық үшін маңызды тұстарына тоқталып, референдумға жергілікті тұрғындардың белсене қатысқанын айтып өтті.
«Мемлекет басшысының Қазақстан халқына Жолдауы аясында саяси жүйе мен әкімшілік-аумақтық құрылымды өзгерту бойынша нақты міндеттер қойылды. Осыған орай өңірлердің дербестігін кеңейту бойынша жұмыстар жүргізіліп, жергілікті өзін-өзі басқару туралы заң әзірленуде. Басты міндет – жергілікті өзін-өзі басқару органдарының өкілеттіктерін кеңейту және жергілікті атқарушы, жергілікті өзін-өзі басқару органдарының жұмысының тиімділігін қамтамасыз етуге бағытталған», – деп атап өтті Нұрлан Ноғаев.
Іс-шараға қатысушылар «Қазақстан Республикасындағы жергілікті мемлекеттік басқару және өзін-өзі басқару туралы» заң жобасы бойынша баяндама жасап, өз ұсыныстары мен пікірлерін ортаға салды.
