2021 жылдың қаңтар-шілде айларының қорытындысымен Шу ауданының әлеуметтік-экономикалық көрсеткіштерінде оң динамика қалыптасқанын аңғаруға болады. Мемлекеттік бағдарламалардың орындалуы, мал шаруашылығы саласындағы өсім, бұқараның баспанаға қол жеткізуі, елді мекендерді ауызсумен қамтып, газдандыру үлесінің артуы, шағын және орта кәсіпкерлік төңірегіндегі көзге көрінер жетістіктер аудан басшылығының жұмысты жүйелі жүргізгенінің нәтижесі.
Айталық, негізгі капиталға тартылған инвестиция көлемі 104,1 пайызға, өнеркәсіп саласында өндірілген өнім көлемі 101,2 пайызға, ауыл шаруашылығы саласының өнімі 102,7 пайызға, құрылыс жұмыстары 103,9 пайызға, пайдалануға берілген тұрғын үй көлемі 111,9 пайызға, қаржы игеру көрсеткіші 99,3 пайызға орындалды. Қаңтар-шілде айларының қорытындысымен ауданда 43,4 млрд теңгенің өнімі өндірілді.
Биылғы жылға ауданымызға барлық мемлекеттік бағдарламалар шеңберінде 5,7 млрд теңге қаражат бөлініп, 57 жоба іске асырылуда.
Аудан экономикасының негізгі қозғаушы саласы ауыл шаруашылығы екені белгілі. Биылғы жылдың өнімі үшін 126 931 гектар алқапқа ауыл шаруашылығы дақылдары отырғызылып, 10 084 гектарға сүр айдалды. Жер пайдалану көрсеткіші 100 пайызға орындалды.
7 560 гектар алқапқа су үнемдеу технологиялары енгізіліп, өткен жылмен салыстырғанда су үнемдеу технологиялары енгізілген алқаптар 2060 гектарға ұлғайды. Бұл ретте ауданда су үнемдеу технологияларын тиімді пайдаланып, егін шаруашылығын дамытуда ауқымды жұмыстар атқарған «Қызылша» ЖШС-ін атап өткім келеді.
Мал шаруашылығы саласында барлық түліктер санатында және барлық өнім түрлерінде өсім қалыптасты.
Шағын және орта кәсіпкерлікті дамытуға мемлекет тарапынан бөлінетін қаржы көлемі жыл сайын артып келеді. Қаңтар-маусым айларында ауданның кәсіпкерлік саласын дамытуға мемлекет тарапынан жалпы 970,6 млн теңге қаржы берілді.
Аудандағы жұмыс істейтін кәсіпкерлер саны 7102-ні құрап, өткен жылдың тиісті кезеңімен салыстырғанда 4,9 пайызға өсті.
