Жүлдегер атанған тұңғыш қазақ қызы

Өзбекстан астанасы Ташкент қаласында басталған дзюдо күресінен әлем чемпионатында отандасымыз Абиба Әбужақынова қола медальға ие болды. 48 келіге дейінгі салмақтағы Абиба Әбужақынова жартылай финалға дейін алқынбай жеткен. Бірақ финалдың жолдамасы сарапқа салынған тұста жапондық Нацуми Цунадедан жеңіліп қалды. Ал қола жүлде үшін тартыста намысты қолдан бермеді. Чилиден келген Мэри Ди Варгастың осал тұсын тапты. Сөйтіп, қазақ қыздары арасында алғаш рет әлем чемпионатында жүлде алып отыр. Бұрын тек Моңғолиядан келген легионер Отгоцэцэг Галбадрах ғана медаль алған. Енді 48 келіде оның ізбасары шықты. Әдетте жарыста Қазақстан қыздарының жеңілісіне ет үйреніп кеткен. Енді Абибаның жолына үмітпен қараймыз. Абиба – әлем чемпионатында жүлде алған алғашқы қазақ қызы. Енді Олимпиадада жүлде алған алғашқы қазақ қызы болсын деген тілегіміз бар.