Оралдық балғын өнерпаз Әлинұр Хамзин халықаралық балалар байқауында өнер көрсетіп, жүлделі 2-орынды иеленді.
Жерлесіміз Беларусь елінің Витебск қаласында өткен дәстүрлі халықаралық «Славян базары» өнер фестивалі аясындағы «Витебск – 2022» балалар байқауында қазақ елінің намысын қорғаған болатын.
Он екі жасар Әлинұр Хамзин – Орал қалалық мәдениет және тілдерді дамыту бөліміне қарасты «Мәдени-ағарту бірлестігінің» құрамындағы «Бәйтерек» комьюнити орталығының «Ән-әуен» үйірмесінің тәрбиеленушісі. Аталмыш орталықтың меңгерушісі Ләззат Касимова талантты балғынның ән өнеріне кәсіби деңгейдегі дайындығы осы үйірмеден басталғанын айтты.
– Байқауға 15 елден қатысқан үміткерлердің арасынан озып шығып, жүлдегерлер қатарынан көрінген Әлинұрдың өнері әділ қазылардың жоғары бағасына ие болғанын естіп қуанып жатырмыз. Байқаудың алғашқы кезеңінде ол «Қазағым-ай» әнін орындаса, екінші кезеңде Майкл Джексонның репертуарындағы бір әнмен сахнаға шықты. Бірінші орынға ие болған ресейлік өнерпаздан Әлинұрдың бір ұпайы ғана кем болды. Біздің орталыққа кішкентайынан бері келіп жүрген Әлинұрдың өнер әлеміне алғашқы қадамы осы жерден басталғанын мақтанышпен айтып өткім келеді, – деді Ләззат Шәденқызы.
Алты жасынан бастап көптеген өнер сайыстарында бағын сынаған Әлинұр Хамзинның ауыз толтырып айтарлықтай жетістіктері де баршылық. Қалалық, облыстық, республикалық, халықаралық байқауларда бас жүлделер мен 1-орындарды еншілеп жүрген шәкірттерінің болашағынан ұстаздары да үлкен үміт күтеді.
Оралға үлкен жеңіспен оралған Әлинұрды 18 шілде күні БҚО мәдениет басқармасы басшысы С.Дүйсентегі мен Орал қалалық мәдениет және тілдерді дамыту бөлімінің басшысы С.Қайырлиев бастаған басшылық құрам, «Мәдени-ағарту бірлестігі» мен «Бәйтерек» комьюнити орталығының ұжымы, өнерпаздары, «Жайық толқындары» әжелер ансамблі, сондай-ақ жанашыр тілекшілері мен достары әуежайдан зор ықыласпен күтіп алды.
