Фермерлер отбасында туған, Кенияда жаттығатын Әлем чемпионы Нора Джеруто туралы не білеміз?
Нора Джеруто спорттағы мансабын 2011 жылы бастаған. 16 жасында қыздар арасындағы жарыста мәре сызығын алтыншы болып кесті.
Дәл сол жылы жасөспірімдер арасындағы әлем чемпионатының финалында Нора су толы шұңқырға құлап кетіп, соған қарамастан мәре- ге алғашқы болып келді. Джеруто 2016 жылы Кения чемпионатында 2-орын алып, соның арқасында Африка чемпионатына жолдамаға қол жеткізді. Ол жарыста рекорд орнатып, алтын иеленді. Джеруто 2017 жылы Қазақстанның «Алтай Атлетикс» жеңіл атлетика клубына қосылды. Спортшы тек 5 жылдан кейін, 2022 жылдың қаңтарынан бастап Қазақстан атынан халықаралық жарыстарға қатысуға мүмкіндік алды. Нора Джеруто қазір 3000 метрге кедергілер арқылы жүгіруде әлемде 1-орында тұр. Биыл мамырда бұл қашықтықты 8 минут 57,97 секундта жүгіріп өткен еді. Ол Орегондағы жарыста жаңа нәтиже көрсетті. Жарыс аяқталған соң жеңіске жету үшін барын салғанын да жасырмады. «Жарыс басталғанда эфиопиялық достарымнан қорықтым. Себебі олар да мен сияқты чемпион. Жеңіске жету үшін барымды салдым, бұл оңай болмады», – деді қазақстандық спортшы Нора Джеруто. Қазақстан атынан Орегон штатындағы жарысқа Кенияда туған үш спортшы қа- тысты. Олар: Нора Джеруто, Дейзи Джэпкемей, Кэролин Кипкируи. Айта кетейік, Нора Джеруто мен Дейзи Джэпкемей апалы-сіңлілі. Әлем чемпионатында Дейзи Джэпкемей 3000 метрге кедергілер арқылы жүгіруден финалға өте алмады. «Ата-анам, жаттықтырушым мен қарсыластарыма, менеджеріме және сіңліме алғыс айтамын. Сіңлім финалға шыға алмады, алайда оның келесіде чемпион болатынына сенемін», – деді Джеруто. Ал Кэролайн Кипкируи әйелдер арасындағы 10 000 метр қашықтыққа жүгіру сайысында 7-орын алды. Ол мәре сызығын 30 минут, 17,64 секундта кесіп өтті. Осылайша Қазақстанның осы қашықтықтағы рекордын жаңартты.
