Орал қаласының әкімі Миржан Сатқанов шаһардағы көпбалалы аналарды қабылдап, оларға алтын және күміс алқаларын табыстады
Бұл туралы Орал қаласы әкімдігінің баспасөз қызметі баяндады. Атап айтқанда, мұндай құрмет оралдық он үш анаға көрсетіліп, олардың төртеуі «Алтын алқа» алса, қалған тоғызы «Күміс алқаның» иегері атанды.
Алтын құрсақты аналарға марапаттарын табыстаған қала басшысы Миржан Мұнайдарұлы:
– Бұл – аналарымыз үшін ең лайықты марапат. Сіздерді жерлестерімізге үлгі етеміз. Еліміздің демографиялық ахуалын көтеруге үлес қосып, бала тәрбиесімен жан-жақты айналысып, ұлттық құндылықтарымыздың жоғалмауына себепші болып жүрсіздер. Сіздерге мықты денсаулық, отбасыларыңызға амандық, шаңырақтарыңызға бақ-береке тілеймін, – деді.
Жиын барысында көпбалалы аналар да уақыт бөліп құттықтаған қала әкіміне өз ризашылықтарын жеткізді. Орал қаласы әкімдігі баспасөз қызметінің мәліметінше, Қазақстан Республикасы Президентінің Жарлығымен Орал қаласы бойынша жыл басынан бері тоғыз ана «Алтын алқамен», 58 ана «Күміс алқамен» марапатталған.
