АҚШ-тың Калифорния штатында басталған алапат өрт әлі де басылмай тұр. Жетінші қаңтар күні таңертең Калифорнияның оңтүстігіндегі Лос-Анджелестің батыс бөлігінен шыққан өрт, бір күн өткенде аса жылдамдықпен жан-жағын жалмап, қалаға қатер төндіре бастаған. Өрт туралы ақпарат беріп жатқан АҚШ медиаларының хабарлауынша, Лос-Анджелес штатында бір уақытта алты жерде өрт шыққан. Қазіргі таңда Орегон, Калифорния, Вашингтон штаттарында да 100-ге жуық орман алқабында өрт тіркеліпті.
Ауа райы мамандары бүгін-ертең жел тұрып, жалын екпіні күшеюі мүмкін деп болжап отыр екен. Сондықтан жергілікті билік тағы 87 мың адамға қауіпсіз жерге кетуге дайын болу туралы ескерту жасапты.
АҚШ-тың дауылды болжау орталығы мен Ұлттық ауа райы қызметі жергілікті уақыт бойынша 14 қаңтарда таратқан хабарында аса қуатты «Санта-Ана дауылы» салдарынан Оңтүстік Калифорнияның кейбір бөліктерінде өрт қаупі «өте қауіпті» деңгейге жеткен. Алдағы 24 сағат ішінде Лос-Анджелес пен оған жақын аудандарда желдің екпіні сағатына 112 шақырымға (70 миль) жетеді деп күтілуде. Бұл бар орман өрттерінің тез таралуына немесе тіпті жаңа өрттердің шығуына әкелуі мүмкін дейді олар. Алдыңғы жаңалықтарға сәйкес, 13-і күні кешке Вентура округінде басталған жаңа өрт Калифорниядағы жел жылдамдығының артуына байланысты ең жоғары өрт қаупі аймағына айналыпты.
Өрт сөндіру бөлімі қатты желдің әуедегі өрт сөндіру жұмыстарына айтарлықтай әсер ететінін және жел жылдамдығы сағатына 48 шақырымнан асатын болса, ұшақтардың қауіпсіз ұша алмайтынын айтып отыр. Қазіргі уақытта Итон өрті мен Палисадс өрті Калифорнияның 155 шаршы шақырым (60 шаршы миль) аумағын өртеп жіберген. Метеорологиялық департамент қатты жел осы аптаның ортасына дейін жалғасады деп болжап отыр.
Жеке синоптикалық AccuWeather орталығы жексенбі күні өрттен келген қаржылық шығындардың бастапқы мөлшері 250-275 миллиард доллар көлемінде деп көрсеткен. Дегенмен апаттың әлі де жалғасып жатқанын ескерсек, бұл сан әлі де артуы мүмкін. Осылайша айналасы бір аптаның ішінде Калифорния штатындағы алапат өрт мыңдаған гектар жерді шарпып, 12 мың нысанды күлге айналдырған. Оның ішінде әлемге әйгілі Голливуд қалашығындағы бірқатар нысандар мен танымал өнер адамдарының қымбат үйлері де күлге айналыпты. Жалпы 13 қаңтарға дейінгі мәліметтер бойынша 24 адам қаза тауып, 16 адам дерексіз кеткен. Мұнан тыс 100 мыңнан аса тұрғын қауіпсіз жерлерге бас сауғалауға мәжбүр болды.
Өрт туралы болжам айтушылар көп. Мамандар қуаңшылықтың кесірінен дала өртінің оңай туылатындығын айтып, өртті табиғи апатқа балағанымен, оны әдейі ұйымдастырған болуы мүмкін деп күдіктенетіндер де бар көрінеді. Әдетте электр сымдарының қысқа тұйықталуынан, нажағайдың кесірінен, құрғақшылықтан немесе табиғат аясында демалушылардың жаққан оттарын әбден өшіріп кетпейтін салақтығынан да өрт апаты туылып жатады. Алайда жан-жақтан анталаған қызыл жалынның түпкі себебі туралы кесім айтуға ерте секілді.
Тағы бір қызық болжам айтып, бұл өртті Құдайдың қаһарына балап жатқандар да бар. Олай дейтіні өрт шығардан бір күн бұрын «Алтын глобус» (Golden Globe Award) кинопремияны табыстау салтанаты өтіпті. Сол шара кезінде жүргізуші сөз сөйлеп: «Осы іс-шара кезінде 82 жылда алғаш рет Құдайдың аты аталған жоқ. Ешкім оған елпектеп алғыс та айтқан жоқ. Құдайсыз-ақ жасадық осының бәрін!» – деп, елді күлдірген екен. Сол күннің ертесі таңертең өрт шығады... Бұл енді кездейсоқтық па, әлде Құдайдың жазасы ма, ол жағы тек Жаратқанға ғана аян…
