Ақтөбе облысындағы мемлекеттік органдардың басшылары, аудан әкімдері масс-медиа өкілдерімен апта сайын тілдесетін болады.Тиісті тапсырманы облыс әкімі Оңдасын Оразалин берді.
"Бірінші кезекте бұл халықпен кері байланыс орнату үшін, азаматтардың қажетіне жедел әрекет ету үшін, расталған ақпарат беру үшін керек. Жауап нақты әрі түсінікті болуы тиіс. Бұдан бөлек, сіздерге жолданған проблемалық сұрақтарға тиісті шаралар қабылдануы қажет. Бұл жұмыс бұдан бұрын да жүргізілген, бірақ соны күшейту керек",- деді Оңдасын Оразалин аппарат жиынында.
Журналистермен және блогерлермен тілдесу әр сейсенбіде апта сайынғы аппарат жиналысынан кейін өтетін болады. Осындай алғашқы тәжірибе өңірде 1 наурыз күні жүзеге асырылды.
Қалалық, облыстық және республикалық деңгейдегі БАҚ өкілдері, пабликтердің әкімшілері әлеуметтік желілерде қысқы спорт түрін дамытуға, азық-түлік бағасын тұрақтандыруға, азық-түлік қауіпсіздігін қамтамасыз етуге, автокөлік жолдарын жөндеуге, Ақтөбе қаласын дамыту жоспары мен т.б. қатысты қырыққа жуық сұрақ қойды.
Түрлі өзекті тақырыптарға комментарий берген спикерлердің қатарында өңірдің тыныс-тіршілігіне жауап беретін 15 облыстық басқарманың басшылары бар.
Қажет болса өңір басшысының өзі де, оның орынбасарлары да спикер ретінде сөйлейтін болады.
Айта кетейік, сұрақтар модерацияланбайды, журналистер мен блогерлер кез-келген, тіпті қолайсыз сұрақтарын да қоя алады.
