Таиландтың Пхукетте қаласында бокстан Thailand Open-2022 атты халықаралық турнир өтті. Байрақты бәсекенің ақтық айқастары барысында шаршы алаң төріне алғашқы болып шыққан қазақстандық боксшы Серік Теміржанов турнирдің алтын медалі үшін таласты. 57 келіге дейінгі салмақ дәрежесінде өнер көрсеткен ол филиппиндік Ян Кларк Баутистамен жұдырықтасты. Жекпе-жек нәтижесі бойынша Теміржанов төрешілердің бірауызды шешімімен жеңіске жетті. Баутиста турнирдің күміс жүлдегері атанды. Бұдан басқа ақтық сында тағы да төрт жерлесіміз бақтарын сынады. Солардың ішінен ағайынды Нұрбек Оралбай (81 кг) мен Айбек Оралбай (91 кг) алтыннан алқа тақса, Сұлтан Мусинов (63 кг) пен Асланбек Шымбергенов (69 кг) күміс медальды еншіледі. Санатәлі Төлтаев (63 кг), Аятолла Тәкіжанов(75 кг), және Сағындық Тоғамбай (91 кг) қола медальға қол жеткізді. Аталған турнирде әлемнің 14 елінен келген 130 боксшы турнир жүлдесін сарапқа салды. Жалпыкомандалық есепте жүлдегерлер қатары төмендегіше: 1. Таиланд 3-4; 2. Индия – 3-3; 3. Казахстан – 3-2; 4. Филиппины – 1-1. Орындар алтын мен күміс медальдар саны бойынша анықталды.
