Тамыз айы туа салысымен ата-ананың басты мәселесі баланы мектепке дайындау болып табылады. Үш айлық демалыстан кейін баланың эмоционалды, психологиялық тұрғыдан мектепке баруға дайын болуы ол бар, одан бөлек керек жабдық пен мектеп формасы мәселесі де тұр. Еліміздің мектеп оқушылары 2003 жылдан бастап бірыңғай мектеп киіміне көшкен болатын. Биыл мектеп формасына аздаған өзгертулер енгізілді, ол 2022 жылғы 30 желтоқсанда Оқу-ағарту министрі қол қойған бұйрыққа сай 5 қаңтардан бастап күшіне енген еді. Республикамызда мектеп формасы енгізілгеннен бері ата-аналар мен педагогикалық қоғамның басым бөлігі бұл бастаманы қызу қолдаған еді. Мектеп формасы оқушылар арасындағы әлеуметтік теңсіздік пен басқа да ерекшеліктерді болдырмайды. Зайырлық сипатта, классикалық үлгіде, бірыңғай түсті. Бірыңғай мектеп формасы ең алдымен оқушылардың арасындағы тәртіп мәселесін қалыптастыратыны да белгілі. Жаңа оқу жылы қарсаңында балаңызға мектеп формасын алатын кезде мектеп формасының жаңа енгізілген ерекшеліктерін ескергеніңіз жөн. Сонымен бұйрыққа сай ендігі жерде ер балаларға арналған мектеп формасы: пиджак, жилет, шалбар, мерекелік жейде, күнделікті жейде, поло жейде немесе тенниска. Қыз балаларға арналған мектеп формасы: пиджак, жилет, белдемше, шалбар, классикалық жейде. Мектеп оқушыларына ендігі жерде галстук тағу міндеттелмейді. Сондай-ақ жаңа ережеге сай, мектеп формасында орта білім беру ұйымының, яғни әрбір мектептің өзіндік ерекшелік белгілері: эмблема, тігіспе, шеврон орналастыруға рұқсат етіледі.
