Мемлекет басшысының жарлығымен бүгіннен, яғни 13 қаңтардан бастап Батыс Қазақстан облысында төтенше жағдай режимі алынып тасталды. Алайда блок-бекеттер өз жұмыстарын жалғастыра береді.
Облыстық полиция департаментінің баспасөз қызметі өңірде шағын және орта бизнестің жұмысы қалпына келтірілгенін, банк бөлімшелері қалыпты жұмысына кіріскенін, сауда орталықтары мен базарлар жұмысын қайта бастағанын, барлық жердегі және әуедегі байланыс жолдары ашылғанын хабарлады. Блок-бекеттердің алынбау себебін құзырлы мекеме құқық қорғау органдарының экстремистік және лаңкестік әрекеттерді ұйымдастырушыларды анықтау және ұстау жұмыстарының жүргізілуімен түсіндірді.
Басты міндет – аталған тұлғалардың облыс аумағына енуіне жол бермеу. Сонымен бірге
барлық шектеулердің, соның ішінде коменданттық сағаттың күші жойылды. Жеке және заңды тұлғалардан уақытша тәркіленген қарулар қайтарылуда. Енді инкассаторлық қызметтерге де тәртіп сақшылары ілесіп жүрмейтін болды.
Тағы бір айта кетерлігі, Алматы қаласындағы қарулы қақтығыста қаза тапқандардың арасында қос азамат – Батыс Қазақстан облысының тумасы болып шықты. Олардың бірі – ерлікпен қаза тапқан Алматы қалалық полиция департаментінің полиция старшинасы Ринат Қамбетов. Ал екінші жерлесіміз – Алматы қаласы әкімдігінің қорғанысы кезінде жеке құрамды басқарған 35-ші жеке десанттық-шабуылдау бригадасының командирі, гвардия подполковнигі Сәндібек Хайровты лаңкестер басынан атып, денесін өртеп жіберген деген суыт хабар жетті кеше. Марқұмның денесі бүгін туған жеріне жеткізілді.
