Бурабайда мұзда жүгіруден жарыс өтті

Президент Іс Басқармасының баспасөз қызметі: «Ақмола облысында орналасқан  «Бурабай» ұлттық паркінде қалың мұз қатқан көл айдынында жүгіруден отандық және шетелдік əуесқой спортшылардың экстремалды жарысы өтті. Жұмбақтастың жанындағы халықаралық жарыста АҚШ, Ресей, Чехия, Польша, Ауғанстан елдерінен және Қазақстанның көптеген облыстарынан келген 300-ден астам спортшы бақ сынады. Қатысушылар бірнеше қашықтықта жарыс жолына шықты.7 шақырым қашықтықта алматылық спортшы Тимур Артюхин жеңімпаз атанса, 14 шақырымға жүгіруде астаналық Владимир Экерт мәре сызығын бірінші болып кесті. 21 шақырымға жүгіруде тағы бір елордалық спортшы Юрий Швецтің бағы жанды. 7 шақырымды скандинавиялық жүріспен өткен көкшетаулық Қазбек Елубаев өзге қатысушылардан оқ бойы озып келді»,– деп  хабарлайды.