Жақында Қазақстан Кубогы жолындағы турнирдің топтық кезеңінің іріктеу сатысындағы алғашқы ойындары өтті. Кездесулер барысында жанкүйерлер қауымы күтпеген сенсациялық нәтижелер тіркелді. Мәселен, былтырғы жылғы ел чемпионы Қостанайдың «Тобылы» сырт алаңда Жамбылдың «Таразынан» 1:6 есебімен ойсырай жеңілді.
Команданың негізгі құрамы Чемпиондар лигасының бірінші іріктеу сатысында Венгрияның «Ференцварош» командасымен өтетін қарымта ойынға дайындалып жатқандықтан, жаттықтырушылар аталған кездесуде негізінен жас футболшыларға сенім артқан болатын. Ал Алматының «Қайраты» өз алаңында Шымкенттің «Ордабасын» 2:0 есебімен сүріндірді. Ел біріншілігінде турнир көшінің аутсайдері саналатын Түркістан облысының «Мақтаралы» өз алаңында «Ақтөбеден» 3:2 есебімен басым түсті. Аталған турда елордалық «Астана» сырт алаңда Талдықорғанның «Жетісу» командасымен 0:0 есебіне қанағат білдірді. Қарағандыда жергілікті «Шахтер» Түркістанның «Тұранынан» 4:0, Қызылордада «Қайсар» Оралдың «Ақжайығынан» 1:0 есебімен басым түссе, Павлодар облысының «Ақсуы» өз алаңында «Атырауға» 0:1 есебімен жол берді. Алғашқы турды Ақтауда жергілікті «Каспий» мен Петропавлдың «Қызылжар» командалары түйіндеді. Мұндағы есеп – 1:1. Турнирдің келесі ойындары 15 шілдеде басталып, одан әрі қарай жалғасады.
