Шағын және орта бизнесті дамытуда мемлекеттік бағдарламалардың көмегі зор.
Биылдың өзінде 2021-2025 жылдарға арналған кәсіпкерлікті дамыту жөніндегі «Ұлттық жоба» аясында қайтарымсыз грант қаражатын алып, кәсібін дөңгелетіп отырғандар баршылық.
Солардың бірі Жаңатас қаласының тұрғыны, 3 топтағы мүгедек Утегалиева Ляйла Лесбекқызы. Ол мемлекеттік қолдауға ие болып, қайтарымсыз грант алып, шағын тігін цехын ашты.
- Мен осы уақытқа дейін жұмыссыз болдым. Өзімнің қолымнан келетін осы сүйікті ісімді кәсіпке айналдыру мақсатында «Бастау Бизнес» жобасына жазылып, кәсіпкерлік негіздерін оқыдым. Бизнес-жоспар әзірлеп, сертификат алдым. Тігін тігу туралы жобамды сәтті қорғап, осы жылдың көктемінде 400 АЕК мөлшерінде (1380000 теңге) қайтарымсыз грантқа қол жеткіздім. Грант қаражатына тігін машинасын, қажетті құрал-жабдықтар мен материалдар сатып алып, жұмысқа кірісіп кеттім. Қазір киімдерді қайта жөндеумен айналысамын, - дейді жеке кәсіпкер Ляйла Утегалиева.
Кәсібінен нәсібін тауып, пайдасын көріп отырған Ляйла Лесбекқызы алдағы уақытта тұрғындардан түскен сұранысқа қарай кәсібінің аясын кеңейтіп, өзге де тігін тігу жұмыстарымен айналысуды көздеп отыр.
