Қазақстан Республикасы Президентінің кезектен тыс сайлауы еліміздегі аса маңызды саяси науқан болды. Сайлау демократиялық қағидаларға сай, ашық, әділ, таза, ең бастысы, заң талаптарына сәйкес өтті деп сеніммен айта аламыз. Бұл қоғамдағы тұрақтылық пен елдегі келісімді сақтаудың және Қазақстанның орнықты дамуын қамтамасыз етудің кепілі болады деп есептеймін.
Шымкент қаласында сайлаушылардың белсенділігі жоғары болды. Адамдар сайлау учаскелеріне дауыс беруге үздіксіз келіп жатқанын көріп қуандым. Демек, біздің халқымыздың саяси мәдениеті жоғарылаған деген сөз. Әрі сайлаушылар ел болашағына өздері жауапты екенін сезініп отыр.
Тағы бір айта кетерлігі, Қазақстанның сайлау жүйесі жылдан-жылға саяси либерализм мен плюрализм қағидаларына сәйкестеніп келе жатқанын көріп отырмыз. Әсіресе, осы сайлауда алғаш рет дауыс беру бюллетенінде «бәріне қарсымын» деген қатардың пайда болғанын айтуға болады. Сайлаушылардың 5,8 пайызының осы қатарды таңдауы – елімізде саяси еркіндік бар екенінің дәлелі. Мұның өзі Мемлекет басшысы Қасым-Жомарт Тоқаевтың кезең-кезеңімен жүргізіп жатқан саяси реформалардың алғашқы нәтижесі деуге болады.
Бетті дайындаған –
Нағашыбай Қабылбек,
Тілекгүл Есдәулет
