АҚШ-тың Миннеаполис қаласында өткен бокс кешінде төрт қазақстандық боксшы өнер көрсетті. Олар – Бек Нұрмағанбет (6-0, 4 КО), Евгений Павлов (6-0, 4 КО), Абылайхан Жүсіпов (1-0, 0 КО) және Әбілхан Аманқұл.
*Бек Нұрмағанбет америкалық ХайнеллУилермен (7-1, 6 КО) кездесті. Суперорта салмақтағы бұл жекпе-жек алты раундқа есептелгенмен, Бек қарсыласын екінші раундта нокаутқа түсіріп, осымен кәсіпқой бокстағы кездесуін жетінші рет мерзімінен бұрын аяқтады. Нұрмағанбет – кәсіпқой бокста WBA International чемпионы.
*Евгений Павлов мексикалық Алексис Салидомен (2-2, 1 КО) айқас өткізді. Кездесу алты раундқа жоспарланған еді. Бірақ, Павлов қарсыласын екінші раундта нокаутқа жіберіп, жекпе-жекті өз пайдасына шешті. Павлов та WBA International чемпионы (екінші жеңіл салмақтағы).
*Абылайхан Жүсіпов кәсіби мансабындағы екінші айқасында тәжірибелі мексикалық Эдгар Рамиреспен (18-20-1, 14 КО) жұдырықтасты. Жекпе-жек жартылай орта салмақта төрт раундтық форматта өтті. Абылайхан қарсыласын бірінші раундта-ақ шаршы алаң төріне сұлатып түсірді. Жүсіпов әуесқой бокста екі рет Қазақстан чемпионы атанған, сондай-ақ үш рет әлем чемпионатының «қоласын» жеңіп алған.
*Әбілхан Аманқұл кәсіби рингтегі дебюттік айқасын америкалық боксшы Девонте Макдональдқа қарсы (1-0, 1 КО) өткізді. Жекпе-жек төрт раундқа жоспарланған еді. Аманқұл жекпе-жек нүктесін үшінші раундта қойып, қарсыласын нокаутпен жеңді. Әбілхан әуесқой бокста үш рет Қазақстан чемпионатын жеңіп алған, сондай-ақ әлем чемпионатында «күміс» жүлдеге ие болған.
