Кәсіпқой бокс: Жәнібек қарсыласын нокаутпен жеңді!

АҚШ-тың Лас-Вегас қаласында кәсіпқой бокстан орта салмақта сынға түскен Жәнібек Әлімханұлы кезекті жекпе-жегінде жеңіске жетті. Жәнібек (10-0, 6 КО) бұл жолы франциялық Хассан Ндам Нжикаммен (38-5, 21 КО) қолғап түйістіріп, 8 раундта қарсыласын нокаутқа түсірді. Осылайша 10 раундқа есептелген жекпе-жек сегізінші раундта мерзімінен бұрын аяқталды. Әуелі қазақ боксшысы үшінші раундта франциялықты нокдаунға жіберді, ал сегізінші раундта төреші жекпе-жекті тоқтатты. Бұл кездесуде орта салмақта екінші дәрежелі WBO Global титулы сарапқа салынды Жәнібек Әлімханұлы 1993 жылы 1 сәуірде дүниеге келген. Әуесқой бокста 2013 жылы әлем және Азия чемпионы атанды. Ал 2014 жылы Азия ойындарында жеңіс тұғырынан көрінді. Кәсіпқой бокста 2016 жылдан бері сынға түсіп келеді. Он жекпе-жегінің барлығында жеңіске жетті. Оның алтауы нокаутпен аяқталды.