Тамыз айының соңғы жексенбісінде еліміз бойынша кеншілердің кәсіби мерекесі аталып өтетіні белгілі. Аталған мерекеге орай, ауданымызда орналасқан «Zhanashyr Project» ЖШС-нің «Жайсан» мыс кен орнына мәслихат төрағасы Жасұлан Әбеновпен бірге арнайы барып, кеншілерді кәсіби мерекесімен құттықтадық. Сондай-ақ, кен орнының басшылық құрамы мен қатардағы кеншілерге жыл бойы еткен еңбектері үшін алғысымызды білдіріп, Құрмет грамотасы мен Алғыс хаттарды табыс еттік.
Құрметті кен өндіру саласының еңбеккерлері!
Сіздерді бүгінгі Кеншілер күнімен шын жүректен құттықтаймын! Бұл мамандық қашанда темірдей төзім мен жауапкершілікті, жанқиярлық пен қайсарлықты талап етеді. Сондықтан да сіздер қажырлы еңбектеріңіз арқылы қоғамда шынайы құрметке бөленіп келесіздер.
Мыс өндірісі біздің индустриямыздың берік негізі екенін нық сеніммен айтуға болады. Бұл саланың еңбеккерлері оны дамытуға қосқан қомақты үлестерін, өз жұмыстарының нәтижесін орынды мақтаныш ете алады. Алдағы уақытта да отандық экономиканың тиімді өркендеуіне және елдің әлеуетінің нығаюына атсалыса бересіздер деп кәміл сенемін. Сіздерге мықты денсаулық, табыс пен игілік, отбасыларыңызға бақ-береке тілеймін!
