Орал қаласындағы Мәншүк Мәметова атындағы №27 мектеп-лицейі биылғы оқу жылындағы Ұлттық бірыңғай тестілеу сынағының қорытындысы бойынша еліміздегі ең үздік 100 мектептің қатарынан көрінді.
Қалалық білім беру бөлімі баспасөз қызметінің мәліметінше, аталмыш білім ордасы тәуелсіздіктің алғашқы жылдарында ашылған санаулы қазақ мектептерінің бірі. Тарихына көз жүгіртсек, 1996-1997 жылдары Мәншүк Мәметованың есімі беріліп, жалпы орта білім беретін мектебі болып жұмыс жасаған білім ошағы 2011 жылы «мектеп-лицей» мәртебесін алған. Содан бері Орал қаласындағы дарынды, үздік оқушыларды даярлайтын физика-математика бағытындағы үздік мектептер қатарына көтерілген.
– Үнемі еңбектеніп, білімін шыңдағандар қашанда шырқау шыңда тұрады. Сондай биік белестен көрінген ұжымның бірі – осы мектеп-лицей. Білім ордасына 2017 жылдан бастап Гүлдана Ганиятқызы Утешева басшылық етіп келеді. Соңғы бес жыл төңірегіндегі жүргізілген жұмыстарды сараптайтын болсақ, 2017-2018 оқу жылынан бастап осы уақыт аралығында білім сапасы 40%-ға көтеріліп, қалалық мектептердің алдыңғы қатарында болды. 2021-2022 оқу жылының қорытындысы бойынша білім сапасы 83,5%-ды құрады, – дейді қалалық білім беру бөлімінің баспасөз қызметкері Эльмира Нұғманова.
Сондай-ақ мектеп-лицейдің ҰБТ қорытындысы бойынша орташа балл көрсеткіші де жыл сайын өсіп келеді. Биылғы оқу жылында орташа балл 103-ті құрап, мектеп түлектерінің 90%-ы мемлекеттік грант иегерлері атанған. Шәкірттері дарындылардың білім додаларында облыстық, республикалық, халықаралық байқауларда мектеп намысын қолдан бермеуі де – ұстаздардың еселі еңбегінің жемісі екені сөзсіз. Жалпы білім беретін пәндер бойынша республикалық олимпиаданың облыстық кезеңінде оқушылары математика, физика, тарих пәндерінен жүлделі орындарды иеленіп, мектеп мерейін асқақтатып жүр.
