Жұмыс сапарымен Мәскеуге барған Қазақстан Президенті Қасым-Жомарт Тоқаев Ресей Президенті Владимир Путинмен кездесу өткізді. Күн тәртібінде Ауғанстандағы жағдайға қатысты өңірлік қауіпсіздік, сондай-ақ Қазақстан мен Ресей арасындағы ынтымақтастық және интеграциялық байланыстар аясындағы өзара іс-қимыл мәселелері қаралды. Мемлекет басшысы Ресей Президентіне Мәскеуге шақырғаны үшін алғыс білдірдіп: «Шын мәнінде, біздің байланыстарымыз ешқашан тоқтаған жоқ. Пандемия кезінде де онлайн жүйесінде және телефон арқылы байланысып тұрдық. Дегенмен, жүз рет естігеннен бір рет көрген жақсы. Екі ел арасындағы барлық бағыттағы өзара ынтымақтастық жоғары деңгейді. Қазақстан мен Ресей – одақтас елдер. Біз үнемі халықаралық күн тәртібіндегі өзекті мәселелерді, қауіпсіздікті, әсіресе екіжақты ынтымақтастықты үнемі пысықтап отырамыз. Елдеріміз арасындағы қатынастарымыз стратегиялық әріптестік бағытында дамып отырғаны қуантады», – деді. Өз кезегінде Владимир Путин екі ел арасындағы тығыз байланыстарды атап өтіп: «Біздің байланыстарымыз үзілген жоқ. Қатынастарымызды тұрақты, өте жоғары деңгейде және барлық бағыттар бойынша жүргізіп келеміз. Бұл – парламентаралық және үкіметаралық байланыстар. Жақында ғана біздің Үкіметіміздің басшысы Қазақстанда жұмыс сапарымен болып, ауқымды шаруалар атқарды және барлық кездесулер бойынша маған баяндап отырды. Пандемияға қарамастан бірінші жарты жылдықтағы тауар айналымы 33 пайызға артты. Халықаралық ұйымдарда, соның ішінде Шанхай ынтымақтастық ұйымы, Еуразиялық экономикалық одақ арқылы да байланыс орнаттық. Барлық бағыттар бойынша ілгерілеушілік бар. Одақтастық байланыстарымыз нығайып, жаңа сапада тың мүмкіндіктерге жол ашылуда», – деді. Екіжақты сауда-экономикалық байланыстар мен өңіраралық қатынастарды нығайтуды қолдаған Қасым-Жомарт Тоқаев: «Жаңа ғана екіжақты тауар айналымының нақты санын айттыңыз. Бұған қоса көршілес өңірлеріміздің тауар айналымы 70 пайызды құрайтынын да айта кеткен жөн. Өңіраралық ынтымақтастық форумында кездесуді жоспарлап отырмыз. Қазан айындағы кездесу жүзбе-жүз өтпесе де, онлайн байланыста болады. Одақтас байланыстарымызға тың қарқын беретін бұл кездесуді жұртшылық күтіп отыр», – деп атап өтті. Жаһандық және аймақтық қауіпсіздіктің өзекті мәселелеріне ерекше мән берген Ресей Президенті: «Әрине, қазіргі таңда ең өзекті мәселе – қауіпсіздік. Әсіресе, Ауғанстандағы жағдай ушығып барады. Дүйсенбі күні Ұжымдық қауіпсіздік шарт ұйымы аясында бейнеконференция режимінде жиналып, пікір алмасамыз деп үміттенемін. Одан кейін қыркүйекте Шанхай ынтымақтастық ұйымы және Ұжымдық қауіпсіздік шарт ұйымы аясында жоспарлы жұмысымызды жүргізе береміз", – деді
Ермек Сахариев
