Мемлекет басшысы Қасым-Жомарт Тоқаев «Жаңа жағдайдағы Қазақстан:іс-қимыл кезеңі» атты Жолдауында (01.09.2020) «Азаматтардың әлеуметтік әл-ауқаты, ең алдымен, баспана мәселесіне тікелей байланысты» деген болатын. Президент тапсырмасына орай нарық жағдайында тұрғын үйдің қолжетімділігі адамдардың табысына және осы міндетті өздігінен шеше алу қабілетіне орай жүзеге асатыны белгілі.
Еліміз тәуелсіздік алғалы бері халықты баспанамен қамту мақсатында бағдарламалар қабылданып, үйлі болғандар қатары артқан. Нұр-Cұлтан қаласында тұрғын үй бағдарламаларына қолжетімділікті арттыру мақсатында әсіресе әлеуметтік баспаналарды көптеп салу бойынша жоспарлы жұмыс жүйелі түрде жүргізіліп келеді. Қала басшысы Алтай Көлгінов: – «Елорда соңғы жылдары әлеуметтік тұрғын үй құрылысы бойынша өз рекордын жаңартып келеді. Бұл деңгей ары қарай да сақтала береді. Келесі жылы қолжетімді тұрғын үй салу үшін алдын ала дайындық басталды: учаскелерді, жобалық-сметалық құжаттаманы дайындау, инженерлік желілерді тарту және аумақты абаттандыру, құрылыс жұмыстары», – дейді. Әкімнің айтуынша, Мемлекет басшысының тапсырмасына сәйкес қалада қолжетімді жеңілдікті тұрғын үй көлемін ұлғайтумен қатар, тұрғын үй бағдарламаларын жетілдіру бойынша да жұмыс істеліп жатыр. – «Мысалы 2022 жылы кемінде 10 мың әлеуметтік пәтер салуды жоспарлап отырмыз. Аудандар «Нұр-Сұлтан – жайлы қала» мастер-жоспарының тұжырымдамасына сәйкес дамып жатыр. Оған сәйкес әлеуметтік нысандар жақын маңайға орналасатын болады. Мәселен 2018 жылы 1800 әлеуметтік пәтер салынса, 2019 жылғы көрсеткіш – 2900, ал 2020 жылы 7 мың әлеуметтік пәтер салынды. Биыл бұл көрсеткішті 10 мыңға жеткіземіз. Келесі жылы да осындай көлемде пәтер саламыз»,– дейді әкім.
Еске сала кетсек, биыл әкімдік әлеуметтік тұрғын үй бағдарламаларына қатысушылар санатын едәуір кеңейтіп, тұрғын үй сертификаттарының мөлшерін 1 млн теңгеден 1,5 млн теңгеге дейін ұлғайтты. Қазан айында жастарға арналған арнайы тұрғын үй бағдарламасы іске қосылды. Әлеуметтік несиелендіру бойынша жеңілдетілген бұл бағдарлама елорданың жас мамандарына (36 жасқа дейін) арналған.
Сонымен қатар әкімнің айтуынша, Елбасы Нұрсұлтан Назарбаевтың бастамасымен қолға алынған «Жұмыс істейтін жастарға жалға берілетін тұрғын үй» бағдарламасы да жалғасатын болады.
