Өнерімен өрге жүзіп, білімімен дара шыққандар ғылымға да үлес қосуда. Оқу жылының соңында қарай мұндай іс-шаралар қызу додаға айналып отыр. 15 сәуір күні Нұр-Сұлтан төрінде жас ғалымдар марапатталды. «Ұлағатты ұстаз-дарынды шәкірт» республикалық ғылыми жобалар байқауы Л.Гумилев атындағы Еуразия Ұлттық университетінде өтті. Аталмыш ғылыми байқау «Білім өркениеті» ұлттық инновациялық ғылыми-зерттеу орталығының ұйытқы болуымен жүзеге асырылған еді. Байқауға түрлі бағыттар бойынша 600-ден астам ғылыми жұмыс ұсынылған. Солардың ішінен ең үздік деп танылған алпысқа тарта жоба иелері марапатталды. Атап айтқанда, Алматы қаласы №156 жалпы білім беретін мектептің 11-сынып оқушысы Ерасыл Қораласбаевтың ұстазы Дана Джаппарованың жетекшілігімен жазған «Нанотехнология-біздің болашағымыз» тақырыбындағы ғылыми жұмысы бас жүлде биігінен көрінді. Ал, қазақ әдебиеті бағыты бойынша Шығыс Қазақстан облысы Ұлан ауданы Райымжан Мәрсеков атындағы орта мектептің 9-сынып оқушысы Мұхамедрахымова Диана ұстазы Рахима Бигалиеваның жетекшілік етуімен жазған «Көпен Ерқасовтың «Ақнайман қырылған» поэмасындағы тарихи шындық пен көркемдік шешім» тақырыбындағы ғылыми жобасы бас жүлде дәрежесіне лайық деп танылды. Сондай-ақ, Алматы қаласы №156 жалпы білім беретін мектептің 9-сынып оқушысы Алина Бекболатова ұстазы Айзат Рақыштың жетекшілік етуімен жазған ғылыми жобасы 2-орынды қанжығалады. Дәл осы әдебиет бағыты бойынша аталмыш мектептің 10-сынып оқушысы Нурмухаметова Радмила ұстазы Арай Шомаханның жетелеуімен жазған ғылыми жобасы 3-орын деңгейінде көрінді. Жеңімпаз шәкірттердің ғылыми жетекшілері-ұстаздары алғыс хаттармен марапатталды.Осылайша Алматы қаласы №156 жалпы біліим беретін мектептің абыройы Елорда көгінде бірнеше рет аталды. Бұл мектеп өнер, білім, ғылым, спорттық байқаулардан қара үзуден бір танған емес. Аталған мектептің оқушылары аудандық Мәшһүр Жүсіп оқулары байқауында бірнеше номинация бойынша топ жарып, Аружан Кішібай ғылыми жобасымен бас жүлде деңгейінде танылса, Аида Мансурова зерттеушілік дарынымен 2-орынды бөктерді, Альбина Аширбай эссе жазудан 3-орынды иеленді. Бұл оқушылардың ұстазы Гүлжамал Сайлау шәкірттерін жан-жақты дамытып жүргенін және бір паш етті.
Осылайша аудандық деңгейдегі байқаулар оқушыларды барынша ынталандырды. Ал республикалық ғылыми жобалар байқауы жас ғалымдардың ғылым әлеміне қанат қағуына тың серпін берді.
