Қазақстан Республикасы Тәуелсіздігінің 30 жылдығы мерекесі қарсаңындағы іс-шаралар легі мемлекеттік рәміздерді ұлықтаумен басталды деп хабарлады Орал қалалық әкімдігінің баспасөз қызметі.
«Мемлекеттік рәміздер – ұлттық мақтанышымыз» деген атаумен өткен салтанатты кешке қала әкімінің орынбасары Мирболат Нұржанов қатысып, жиналғандарды атаулы мерекемен құттықтады.
–Баршамызға белгілі, биыл – ұлық мерекеміз Тәуелсіздіктің 30 жылдығы. Осыған орай Орал қаласында бір ай көлемінде «30 жұлдызды күн» аясында іс-шаралар ұйымдастырылатын болады. Отыз күн ішінде спорттық, мәдени, мерекелік, ұлттық спортты дамытуға арналған шаралар өткізіледі. Сондай-ақ жоспарға сәйкес Тәуелсіздік мерекесі қарсаңында жаңа әлеуметтік нысандар ашылатын болады. Өткізілетін шаралар шеңберінде әр сала бойынша барлық жастағы адамдар қамтылатын болады. Басты мақсатымыз – ұрпақтар сабақтастығын үзбей, дәстүр жалғастығын дамыту, – деді Мирболат Сағынғалиұлы.
Салтанатты кеште патриоттық әндер шырқалып, көрермендер арасында мемлекеттік рәміздерге қатысты викториналық сұрақтар ойнатылды. Кеш ақын Қадыр Мырза Әлінің сөзіне жазылған Ескендір Хасанғалиевтің «Атамекен» әнімен түйінделді.
