Тәуелсіздіктің 30 жылдығына орай Қазақстан Республикасы Ұлттық ұланның «Батыс» өңірлік қолбасшылығының 5517 әскери бөлімінде өткен спорттық іс-шараны аталмыш әскери бөлім мен Орал қалалық жастар ресурстық орталығы ұйымдастырды.
Волейболдан бөлім командирінің кубогі сарапқа салынған жарысқа сегіз команда қатысты. Спорттық іс-шараның ашылу салтанатында сөз алған 5517 әскери бөлімінің командирі, подполковник Сағындық Алкайдаров әскери қызметшілер арасында салауатты өмір салтын насихаттап, спортшылардың шеберлігін шыңдау өте маңызды екенін жеткізді.
Жарыс нәтижесінде 5517 әскери бөлімінің басқарма офицерлері жеңімпаз атанды. Ал 2-орынды материалдық-техникалық қамтамасыз ету ротасының командасы иеленсе, 3- орынға жедел мақсаттағы батальонның спортшылары ие болды. Сондай-ақ қатысушылар арасында аға лейтенант Сұлтанбек Камалов – «Үздік шабуылшы», қатардағы жауынгер Абос Абдусаматов – «Үздік тосқауылшы», қатардағы жауынгер Марат Ғазизов «Үздік байланыстырушы» аталымдарымен марапатталды. Жеңімпаз командалар кубокпен, медальдармен, мақтау қағаздарымен және естелік сыйлықтармен марапатталды.
