Соңғы екі күнде ауданымызда қар тоқтаусыз жауып, шалғай елді мекендерге, Шу қаласы мен аудан орталығына қалың қар түсті. Дегенмен, өңірдегі жол құрылыс мекемелерінің және коммуналдық шаруашылықтың жол тазалау техникалары тәулік бойы тынымсыз жұмыс істеп, жолдарды қардан тазалауда. Бұл бағыттағы жұмыстар тоқтаусыз жүргізілетін болады. Әрбір елді мекендегі ахуал жіті бақылауда.
Оның үстіне, ауылдық округтердегі шаруа қожалықтардың да техникалары көмекке әзір тұр. Әзірге ауыл-ауылға, қыстақтарға қатынас аса қиындық туғызып отырған жоқ. Бұған дейін де шалғайдағы шаруа қожалықтарды аралап, жергілікті шаруалармен тілдескен болатынбыз. Тиісінше, қалың қардың жауатынын алдын ала ескертіп, сақтық шараларын қатаң сақтау керектігін айттық. Десе де, шалғайдағы шаруашылықтар мен малшыларды табиғаттың тосын мінезінен әлі де сақ болуға шақырамыз.
