Қазақ құрамасы топ жарды

ҚР Спорт және дене шынықтыру комитеті Facebook парақшасында: «Өзбекстанның Сухандария облысына қарасты Термез ауданында өткен халықаралық турнирге 6 көкпар командасы қатысты. 23-24 наурыз күндері өткен дүбірлі додада ел құрамасы ерекше ойын көрсетті. Спортшыларымыз турнир жеңімпазы атанып, бас жүлдеге тігілген 200 млн сомды (8,6 млн теңге) қанжығаларына байлады»,  – деп жазады. Ақтық ойында Өзбекстан құрамасымен сынға түскен жерлестеріміз алаң иелерін 6:0 есебімен ойсырата ұтты. Халықаралық сайысқа Өзбекстанның өзінен 4 команда қатысты. Естеріңізге сала кетейік, 2019 жылы Өзбекстан көкпардан әлем чемпионатын өткізуді жоспарлаған болатын. Алайда пандемияға байланысты бұл чемпионат кейінге шегерілген-ді. Дегенмен қазіргі таңда эпидемиологиялық ахуалдың жақсаруына қарамастан Өзбекстан тарапы бұл чемпионатты өткізу-өткізбеу туралы нақты шешімін айтқан жоқ-ты. Сондай-ақ, аталған комитеттен ҚР Ұлттық спорт қауымдастығы биыл қыркүйекте ересектер арасында көкпардан ІІ әлем чемпионатын өткізу жоспары туралы хабарланды.