Қазақстан мен Қырғызстан шекарасында жүк көліктері тағы да кезек күтіп тұр. Қазір шекарадан өте алмай тұрған көлік саны 200-ге жуық. Соңғы кезде Қырғызстанда мұндай жағдай жиі қайталанады. Бұл жолы жүк көліктері Кен-Булун өткелінде тұр. Жүк тиелмеген көліктер Қырғызстаннан Қазақстанға тек осы аралықтан ғана өте алады. Алайда екі күннен бері кезек жылжитын емес. Көлік кептелісіне не себеп болғанын әзірге ешкім түсіндірген жоқ. Әдетте тауар немесе азық-түлік тиелген жүк көліктеріне шекарадан өту қиын. Сарапшылар мұны Қытай тауарының Орталық Азия бойынша транзиті және мол пайда әкелетін өнім болғандықтан сауда тартысы бар деп түсіндіреді. Оған қоса қырғыз экспортёрлері өнімнің сертификаттары мен электронды құжатты талап ететін сауда ережелеріне салақтау. Қырғыз тарапы жаңа жылдан кейін тауарларды тек электронды құжатпен жіберуге міндеттеме алған. Алайда бұл шартты орындап жатқан жоқ. Электронды құжаты жоқ кез келген көлікті қазақстандықтар бақылайды. Сондай көлік көп екенін көріп тұрсыз, сондықтан 200, 300 көлік шекарада тұрып қалды. Шекарадағы кезекті азайту үшін логисттер бақылаушы органдарға электронды және өзге де құжаттарды шекараға жетпей Қырғызстан аумағында тексеруді ұсынады. Ал құжаттары дұрыс рәсімделген көлік жүрізушілері шекарадан кедергісіз өтеді.
