Елордада өтіп жатқан «Атамекен» ұлттық кәсіпкерлер палатасының кезектен тыс ІХ съезінде ел тұрғындарын қазақстандық өніммен қамтудың маңыздылығына тоқталған ҚР Премьер-Министрі Әлихан Смайылов: «Өнеркәсіптік саясат туралы қабылданған заң шеңберінде жергілікті қамтуды дамыту мақсатында құндылықты дамыту туралы бағдарлама әзірлеу керек. Біз отандық өнім мен тауарларды сатып алуды қамтамасыз етуіміз қажет. Сонымен қатар жұмыс және көрсетілетін қызметтерді пайдалану бойынша да отандықтарды қолдау керек. Әсіресе, оффтейк келісімшарттарға қол жеткізу бойынша мүмкіндіктер бере отырып, ірі кәсіпорындардың айналасында шағын және орта бизнестің дамуына ықпал ету маңызды. Пандемия, әлемдік экономикалық дағдарыс және қаңтар оқиғасы ел экономикасы үшін жаңа сынақ. Мемлекет басшысы өз сөзінде бірқатар маңызды әлеуметтік-экономикалық міндеттерді жүйелі түрде шешу жөнінде нақты тапсырмалар берді. Бұл ең алдымен, макроэкономикалық тұрақтылықты қамтамасыз ету, азаматтарымыздың әл-ауқаты мен өмір сүру деңгейін арттыру. Сондай-ақ, экономикалық игіліктерді әділ бөлу үшін экономиканы әртараптандыру және монополиясыздандыру саясатын жүргізу. Азық-түлік бағасын тікелей Үкімет реттемеуі керек. Бизнестің дамуына шамадан тыс әкімшілік жүктеме кедергі»,— деп атап өтті.
Одан әрі Бас уәзір: «Мемлекет басшысы атап өткендей, билік пен бизнестің сындарлы өзара іс-қимылы әлеуметтік тұрақтылықтың негізін құрайды. Үкімет бизнеспен бірлесе жұмыс істеуге дайын. Баршаңызды Президент белгілеген міндеттерді бірге іске асыруға шақырамын. Атамекен палатасының шеңберінде және жақында құрылған Үкімет жанындағы отандық кәсіпкерлер кеңесінің жұмысына белсенді атсалысу керек. Отандық бизнесті дамытуда Үкімет тарапынан қолдау әдеттегіше жалғасады. Үкімет пен бизнес —қоғамдастықтың ортақ күш-жігерінің арқасында ғана жетістіктерге қол жеткізуге болады. Барлық қиындықтарды еңсереміз»,— деп мәлімдеді.
