Премьер-министрдің бірінші орынбасары Роман Скляр кәдеге жарату төлемдерінің жаңа мөлшерлемесін жариялады. Бұл туралы Роман Скляр «Хабар 24» телеарнасына тікелей эфирде берген сұхбатында айтты.
«Шешім қабылданды, автомобиль өнеркәсібін ынталандыру деңгейі автомобиль мен өндірілетін ауылшаруашылығы техникасының барлық түрі бойынша мөлшерлемені 50 пайызға төмендетуге мүмкіндік береді», – деді Премьер-министрдің бірінші орынбасары.
Сонымен қатар Роман Скляр автосалондардағы көлік тапшылығы әлемдегі микросхема (чиптер) тапшылығымен байланысты екенін айтты.
Бұған дейін экология, геология және табиғи ресурстар министрі Серікқали Брекешев автокөліктер мен ауыл шаруашылығы техникаларын қайта өңдеу төлемінің жаңа мөлшерлемесі 23 ақпанда жариялайтынын мәлімдеген еді.
Еске салайық, 19 қаңтарда Үкімет «ӨКМ Операторы» ЖШС-ға қатысты қаулы қабылданады, онда кәдеге жарату төлемі есебінен құрылған активтерді мемлекет меншігіне алу туралы шешім қабылданды.
