Алматы қарқынды дамып келеді. Алматы қаласында көшені жарықтандыру жүйесіне ерекше мән беріледі. Алматы сыртқы жарықтандыру жүйесін жаңғыртып жатыр.
2023 жылдың тамызында Алматыда өткен жиында ҚР Президенті Қасым-Жомарт Тоқаев қаланы 2025 жылдың соңына дейін толық жарықтандыруды тапсырды. 2024 жылы жарықтандыру деңгейі 85%-ға жеткен, ал 2025 жылғы міндет – бұл көрсеткішті 100%-ға жеткізу.
Қала әкімінің тапсырмасымен үш кезеңнен тұратын жоспар әзірленді.
Биылғы 7 айдың ішінде қаланың 8 ауданында 21 600 жарық нүктесі қалпына келтіріліп, 230 шақырым кабель ауысып, жаңадан 1 225 сыртқы жарық бағаны орнатылды. Үздіксіз жұмыс істегендіктен, азаматтардың жарықтандыруға байланысты өтінімі былтырғымен салыстырғанда 2,5 есеге қысқарып, биыл 8 445-ақ арыз түскен. Өңірлік коммуникациялар қызметі ұйымдастырған пресс-тур барысында жыл соңына дейін қала көшелерінің жарықтандыру деңгейін 100 %-ға жеткізу жоспарланып жатқаны белгілі болды.
Қаланың негізгі көшелерінде де осындай жұмыс қолға алынды. Мысалы, Сейфуллин даңғылы екі есе жарық бола түсті. Сәтбаев көшесінен Алматы 1 вокзалына дейінгі аралықтағы бағандарға екі шам бекітілген инновациялық консольдар орнатылып жатыр, бұрын әр бағанға бір-бір шамнан ғана ілінетін. Жұмыс Бостандық, Алмалы, Жетісу мен Түрксіб ауданында да жалғасты. Жолдан бөлек, жаяулар жүретін жағы да жарықтандырылды. Абай мен Достық даңғылында, сондай-ақ Наурызбай батыр, Сәтбаев, Брусиловский, Өтеген батыр көшесінде де осындай жоба іске асырылды.
Тимирязев көшесі де жобадан сырт қалған жоқ. Желтоқсаннан Жандосовқа дейінгі жердегі шамдар түгел ауысып, жаяу жүргіншілер жағындағы ескі шамдар жаңа LED жарықдиодты шамдарға ауыстырылады. Тротуарларында өмірі жарық болмаған жерде жаңадан торшер бағандары пайда болады.
Сейфуллин – Шолохов қиылысындағы паркте автополив жүйесін жүргізетін мердігердің кесірінен үзілген кабель желісі қалпына келтірілді. Аллеяларда жанған шамдар ауыстырылып, жарық қалыпты режимде жұмыс істеп тұр.
Республика сарайының алдындағы Абай алаңында шамамен 1 шақырым кабель желісі мен ескірген шамдарды (50 дана) ауыстыра бастады. «Сондай-ақ 28 гвардияшылар-панфиловшылар саябағында 250 шамдық лампалардың орнына қуаты жоғары және жарығы мол LED жарықдиодты шамдарды қояды», – деді пресс-тур барысында «Алматы Қала Жарық» МКК сыртқы жарықтандыру қызметінің басшысы Нұрасыл Берік.
Шығыс айналма автожолында шамамен 800 шам құрылғысын қуаты төмен (150 Вт) шамалардан қуаты жоғары (200 Вт) шамдарға ауыстыру жұмысы жүргізілді, бұл жарықтандыру деңгейін 20-дан 70 люксқа дейін арттырды. Рыскұлов даңғылында да осындай жұмыс басталып, әлі жалғасып жатыр.
Сонымен бірге, бұрын жарық болмаған қаладағы жерлерге жаңа желілер салынып жатыр. Жұмысты барлық 8 ауданның әкімдіктерімен бірлесіп қолға алған. Тек «Алматы Қала Жарықтың» күшімен бұрыннан қараңғы көшелер мен сыңар көшелерге шамамен 400 баған, 500-ден астам консоль мен шамамен мың жаңа шам орнатылды.
Жарықтандыру желілерін салу мен жаңалау жұмысында негізгі жауапкершілік аудандық әкімдіктер мен Қалалық мобильділік басқармасына жүктеледі. Саябақтар, скверлер және өзен арналарын жарықтандыру Қоғамдық кеңістікті дамыту басқармасының құзырында. Жолдарды жарықтандыру Құрылыс басқармасына жүктелген. Ал «Алматы Қала Жарық» МКК сыртқы жарықтандыру желілерінің қызметі мен жөндеу жұмысына жауапты.
