Шымкентте шалғай орналасқан шағынаудандарды сапалы электр жарығымен қамтамасыз ету мақсатында 2025 жылға дейін 8 қосалқы электр станция ел игілігіне ұсынылмақ. Биылғы жылы оның үшеуі іске қосылса, оның біреуі – тамыз айында шаһардың солтүстік бөлігін сапалы электр қуатымен қамтитын «Бозарық» қосалқы станциясы пайдалануға берілген болатын.
«Нұр Отан» партиясының сайлауалды бағдарламасы аясында әзірленген «Өзгерістер жолы: Әр азаматқа лайықты өмір!» атты Жол картасының бесінші бағыты Шымкент қаласындағы шалғай елді мекендерді көркейтуге арналған-ды. Бұдан бөлек, 12 елдімекенге ауыз су құбыры тартылады. Осылайша ауыз сумен қамту көрсеткіші 100 пайызға жеткізіледі. Осы жылдар ішінде қала тұрғындары толығымен көгілдір отынға қосылса, сағатына 250 мың метр кубты құрайтын автоматтандырылған газ тарату станциясы осы жылдың қазан айының соңында іске қосылады. Сонымен бірге қалада 84,4 шақырым болатын кәріз жүйесі салынады. Осылайша бес жылда кәріз жүйесімен қамту көрсеткішін 65 пайызға жеткізу көзделуде.
