Өткен апта еліміздегі саяси маңызы зор тарихи оқиға – Қазақстан Республикасы Президентін кезектен тыс сайлау науқанымен түйінделді. Бұл күні Орал қаласында орналасқан 123 сайлау учаскесіне барып, қалаған үміткеріне дауыс берген жерлестеріміз өз таңдауларын жасады.
Сайлау күні таңертеңгі сағат 7-ден бастап сайлау учаскелеріне ағылып, отбасыларымен, көршілерімен, ұжыммен бірге өз таңдауларын жасаған оралдықтар үшін бұл күн маңызды болды. Себебі олар жаңа Қазақстанның лайықты көшбасшымен бірге көркеюіне өз үлестерін қосты.
Орал қалалық әкімдігінің баспасөз қызметі берген мәліметке сүйенсек, сайлаушылардың арасында кәмелет жасына толып, ең алғаш рет дауыс берген жастар да, Отанының ертеңіне алаңдайтын ардагерлер де, түрлі додаларда ел намысын қорғап жүрген спортшылар да болған. Мысалы, биыл бірінші рет дауыс беру құқығына ие болған студент жастар Құралай Ақболатова мен Бекарыс Қибатов өз таңдауларын жасап қана қоймай, естелік сыйлыққа да ие болыпты. Ал Ұлы Отан соғысының ардагері Вениамин Скаленко мен оның зайыбына үйден дауыс беруге мүмкіндік берілген. Жалпы сайлау учаскесіне денсаулығына және басқа да белгілі себептермен бара алмаған тұрғындарға тұрғылықты жері бойынша дауыс беру жәшіктері жеткізілген.
20 қараша күні Оралда қалаішілік қоғамдық көліктер жолаушыларды тегін тасымалдады. Ал облыс орталығындағы сауда үйлерінде шағын концерттер ұйымдастырылып, мерекелік көңіл күйді еселеді.
