Шешендік сөздер қазақ ауыз әдебиетінің күрделі де көркем бір саласы.
Шынайы шешендік қиялдан тумайды, өмірлік оқиғалардан, табиғи құбылыстардан туған.
Қазақтың дәстүрлі, ата–бабадан бізге жеткен шешендік сөздері шешендік толғау, шешендік арнау, шешендік дау-дамайды шешу сынды түрлерге бөлінеді.
Бүгін аудандық кітапхананың «Коворкинг» орталығында «Атадан қалған–асыл сөз» атты «дөңгелек үстел» басында сайыс өтті.
Сайыстың негізгі мақсаты мемлекеттік тілімізді кеңейту, тіл мәдениетін көтеру. Ата-бабамыздан қалған асыл, шешендік сөздерді кейінгі жас буындардың бойына сіңіру.
Аталған шараны ҚР Журналистер Одағының мүшесі, еңбек ардагері Диханбай Ақділда жүргізді.
«Дөңгелек үстел» сайысының ашылуында аудандық алқа билер кеңесінің төрағасы Серік Аппазов сөз сөйлеп, өткізіліп отырған шараның маңыздылығына тоқталды.
Шара барысында жазушы, Халықаралық «Алаш» әдеби сыйлығының иегері Пернебай Дүйсенбин бастаған ауданымыздың сөзі дуалы, батасы уәлі қарияларымыз Марқаш Мизенбаев, Шәріпбек Қалжанов, Құдайберген Мәмбетов және Дүйсенбек Пернебаев ұлттық өнеріміздің тарихындағы билер мен шешендерден, ата-бабадан қалған асыл, шешендік сөздерді айтып, жиналғандарға мән-мағынасын түсіндіріп берді.
Сайыс қорытындысы бойынша бірінші орынды Пернебай Дүйсенбин, екінші орынды Құдайберген Мамбетов, жүлделі үшінші орынды Шәрііпбек Қалжанов қариялар иеленді.
Үздік деп танылған және белсенді қатысқан қариялар ұйымдастырушылар тарапынан Алғыс хаттармен, заттай сыйлықтармен марапатталды.
