Кешеден бері қырғыз басылымдары Сириядан елге жеткізілген қандастары жайлы ақпараттарды жазып жатыр. Қырғыз Республикасы Сыртқы істер министрлігі баспасөз қызметінің хабарлауынша, 20 ақпан күні «Айкөл-5» гуманитарлық миссиясы аясында Сирияның солтүстік-шығысындағы арнайы лагерьлерден Қырғызстанның 99 азаматы әкелінген. Олардың 28-і әйел, 71-і балалар. Дереккөздерде айтылуынша, бұл гуманитарлық миссия АҚШ үкіметінің қолдауымен жүзеге асқан.
Қазақстан тарапы ұйымдастырған «Жусан» операциясынан кейін Орталық Азия елдері Сириядағы қақтығыс аймағында қалып қойған отандастарын елге жеткізу жұмыстарын қолға ала бастап еді. 2018 жылы Қырғызстан Ұлттық қауіпсіздік мемлекеттік комитеті таратқан мәліметте Сириядағы соғысқа «үлес қосу» үшін Қырғызстаннан 850 «жиһадшы» кеткен екен.
Бұған дейін Қырғызстанның Сыртқы істер министрі Жээнбек Кулубаев Ирак пен Сирияда түрмеде отырған 200 қырғыз әйелі мен 400 баланың тізімі анықталғанын айтқан. Соңғы рет 2023 жылы 8 желтоқсанда Сирияның солтүстік-шығысындағы лагерьлерден Қырғызстанның 95 азаматы әкелінген.
