20 қыркүйек күні Парламентте мақұлданған аталмыш заң жобасы Қытай сайттарында жаппай таралып жатыр. Олардың барлығы «Қазақстан Республикасының Үкіметі мен Қытай Халық Республикасының Үкіметі арасындағы Тараптар мемлекеттерінің азаматтарына қатысты ақпарат алмасу туралы келісімді ратификациялау туралы» заң жобасынын айта келіп, ары қарай тарқата түскен.
Мысалы «zhuanlan.zhihu.com» сайты «Қытай мен Қазақстан азаматтары туралы ақпарат алмасу жөнінде уағдаласты, шыңжаңдықтар Қазақстан азаматтығын алғысы келсе, міндетті түрде Қытайдың рұқсатын алуы керек» деген тақырыппен шағын материал жариялапты. Онда аталған құжат туралы айта келіп, «бұл келісімнің мазмұнына сәйкес, «Қытай азаматтары, яғни Қытай қазақтары Қазақстанға көшіп келгеннен кейін, Қазақстан азаматтығын алғысы келсе, Қытай тарапының келісімін алуы керек. Сонымен қатар, Қытай Үкіметі талап еткен жағдайда Қазақстан Үкіметі Қытайдан көшіп келіп Қазақстан азаматтығын алған кез келген адамды кері қайтарып беруге міндетті» деп жазыпты.
Аталған мақала соңында пікір білдірушілер арасында біреулері «екі мемлекеттен де пайда көріп жүрген алаяқтарды тежеуге қолданылатын заң» деп жазса, келесі біреулері «бұл заң әлі де түсініксіз екен» депті.
Біздің таңғалғанымыз өзге сайттарға да көшіріліп басылған бұл мақаладағы «Қытай азаматтары» деп қолданылуға тиісті сөздің орнына «шыңжаңдықтар» деген сөздің бөлек жазылуы еді. Бұл жерде тарихи атажұртына қоныс аударғысы келетін этникалық қазақтарды бөле-жара айтып тұрғаны бесенеден белгілі еді.
ЕРҚАЗЫ СЕЙТҚАЛИ
