Алматыда өткен «MTK Kazakhstan» бокс кешінде 21 жастағы қазақстандық боксшы Талғат Шайкен (6-0, 4 КО) жартылай орта салмақтағы WBC тұжырымы бойынша жастар арасындағы әлем чемпионының «иесіз» белбеуі үшін украиналық Владимир Гордиенкомен (9-3, 4 КО) жұдырықтасты. Он раундтық жекпе-жек төрешілердің бірыңғай шешімі бойынша қазақстандықтың жеңісімен аяқталды. Осылайша, Талғат Шайкен кәсіпқой бокс рингінде жетінші жеңісіне жетіп, WBC тұжырымдамасы бойынша Жастар арасындағы әлем чемпионы атанды.
Тағы бір қазақстандық Сұлтан Зәуірбек (11-0, 7 КО) пен британиялық Райан Уилер (16-1-1, 0 КО) арасындағы сайыста Уилер төртінші раундта екі рет нокдаунға түсті. Ал Еділ Қожамбердиев (10-2, 10 КО) түрік Хамза Гюнешке (6-0, 4 КО) қарсы шықты. Боксшылар крузервейттегі UBO Inter-Continental чемпионы белдігі үшін бақ сынасты. Жекпе-жек қорытындысы бойынша Еділ Қожамбердиев бірінші раундта қарсыласын нокаутқа жіберіп, жеңіске жетті.
Алматыдағы бокс кешінің негізгі жекпе-жегінде тағы бір отандасымыз Қамшыбек Қоңқабаев (3-0, 3 КО) және Стивен Уордпен (13-1, 4 КО) WBA Gold белдігіне таласты. Кездесу 12 раундқа есептелген. Алайда, ол аяғына дейін жетпеді. Жекпе-жек жетінші раундта Қамшыбектің жеңісімен аяқталды.
