Теннис: Жас теннисшілеріміз Үндістанда топ жарды

Үндістанның Калькутта қаласында жастар арасында екінші санаттағы ITF Juniors J200 турнирі мәресіне жетті. Осы байрақты бәсекеде ел намысын қорғаған Ерасыл Ерділдә мен Виталий Зацепин жұптық сында үздік шықты. Қазақстандық дуэт финалда жапониялық Сатора Накаджима – филиппиндік Джоа Рей Поскуаны 6:2, 7:5 есебімен ұтты. Қыздар арасында Асылжан Арыстанбекова жекелей сында ширек финалға дейін жетті. Ал Айя Нұпбаймен бірге жұптық сында жартылай финалда қарсыластарына есе жіберді. Айта кетерлігі, Литвада 14 жасқа дейінгілер арасында үшінші санаттағы Tennis Europe жарысында Ярослав Пшеничный жұптық сында финалист атанды. Ол латвиялық Томас Далдериспен бірге соңғы бәсекеде ғана эстониялықтар Кен Инка – Лукас Раудкивиге жол берді – 2:6, 4:6.