«Тобыл» – ел чемпионы

Футболдан Премьер-лига командалары арасындағы ел біріншілігі мәресіне жетті. Биылғы доп додасында бас жүлде Қостанайдың «Тобыл» командасына бұйырды. Қостанайлық клуб соңғы турда Оралда «Ақжайықты» 2:0 есебімен тізе бүктірді. Чемпиондықтан тағы бір үміткер елорданың «Астанасы» өз алаңында Түркістанның «Тұранымен» 1:1 есебіне қанағат білдірді. Ал үздік үштікті түйіндеген Алматының «Қайраты» сырт алаңда Талдықорғанның «Жетісуымен» 0:0 есебімен тең түсті. Төртінші орын үшін таласта Петропавлдың «Қызылжары» Шымкенттің «Ордабасы» клубын 3:2 есебімен сүріндірді. Нәтижесінде төртінші орын петропавлдық командаға бұйырды. Сондай-ақ сырт алаңда Қызылорданың «Қайсары» «Таразды» 2:1, Ақтаудың «Каспийі» «Ақтөбені» 5:1 есебімен тізе бүктірді. Ал Қарағандыда «Шахтер» «Атырауды» 3:1 есебімен жеңді. Енді Қазақстан кубогының жартылай финалдық ойындары өтеді. Жарыстың аталған сатысында «Астана» мен «Қайрат», «Тобыл» мен «Шахтер» кездеседі. Командалар 1/2 финал ойындарын 6 және 20 қараша күндері өткізеді. Финал 28 қарашаға белгіленген.