Тоқаевқа басты қауіп – олигархтар

Тоқаевқа басты  қауіп – олигархтар

NEGE-ге берген сұхбатында  дипломат әрі  саясаттанушы Қазбек Бейсебаев: «Президент Қасым-Жомарт Тоқаев Маңғыстау облысының жұртшылығымен кездесу барысында: «Ұлттық мүддені аспен де, таспен де қорғаймыз», – деп,  ел тәуелсіздігін қарумен қорғауға дайын болуды тұспалдап жеткізді. Халықтың билікке қоятын сауалдары бар. Президент соған жауап беріп жатыр. Бұл да – саяси технология. Бір жағынан қауіп-қатер де бар. Оны мойындау керек. Украинадағы соғыс Ресейдің әскерінде де, қару-жарағында да олқылық бар екенін көрсетті. Кейбір әскери мамандар кәсіби әскерден бас тартып, жаппай әскери міндеттілікті қайтаруға, әскери борышты 2 жылға дейін ұзартуға шақырып жатыр. Әлемде қауіп-қатер бар. Қитұрқы ештеңе жоқ бұл жерде. Қазақстан – Ресей немесе Қытай секілді алпауыт мемлекет емес. Халқымыздың саны небәрі 20 миллион ғана. Әскеріміз де аз. Біз секілді мемлекеттерге дипломатия өте маңызды. Соңғы екі-үш айда әлемдік тұлғалар Қазақстанға келіп, маңызды мәлімдемелер жасады. Мәселен, Қытай басшысы Си Цзиньпин келіп кетіп, Қазақстанның аумақтық тұтастығына Қытайдың кепілдік беретінін айтты. Рим папасы да келді. Түркия басшысы Ердоған да осы тақілеттес пікір білдірді. Президент Тоқаев Путиннің өзімен де кездесіп жатыр. Дипломатиялық жағынан бәрі дұрыс қадам. Десе де, «өз әскерін асырамаған, өзгенің әскерін асырайтын болады» деген тәмсілді ұмытпағанымыз жөн. Әскери борышты өтеудің мерзімін ұзартып, әскерімізді заманауи қару түрлерімен жабдықтау қажет. Украинадағы соғыс көп нәрсені көрсетіп жатыр. Мемлекет болғаннан кейін қарулы күштерге баса назар аудару керек. Самарқанд саммиті – ішкі ісіміз. Біз – түркі мемлекетіміз. Бұл сияқты араб елдерінің, Латын Америкасының өз ұйымдары бар. Түркі мемлекеттері Кеңес одағы ыдырап кеткеннен кейін ғана егемендігін алды. Оған дейін әлем картасында жалғыз түркі мемлекеті Түркия ғана болды. Енді ғана қарым-қатынасымызды нығайтып жатырмыз.

Шынтуайтына келсек, мемлекеттер тіл мен дінді негіз етіп одақ құра алмайды. Діні бір, тілі ұқсас украин және орыс халықтары соғысып жатқан жоқ па? Басты факторлар – экономика мен саясат. Ресейді алып қарасақ, бұл елдің халқы тек орыстардан тұрмайды. Татарлар, башқұрттар және басқа да түркі халықтары бар. Біздің қазақтар да миллионға жуық. Шынын айтқанда, орыстардың бізде шаруасы да жоқ. Түркі мемлекеттері бас қосып, бірге шаруа атқарса да, онысы Ресейге қарсы бағытталмаған. Айталық, Түркия – қазір Ресеймен ынтымақтастығын арттырып жатқан Еуропадағы жалғыз ел. Ресейден газ құбырын тартпақ. Түркия – керемет саудагер. Газды Ресейден алып, ертең Еуропаға қайта сататын болады.  Ресей саясаткерлері, баспасөзі бұған қызғанышпен қарайтын шығар. 

    Рас, Тоқаев соңғы кездері мінез көрсетіп жүр. Ондағы мақсаты – тек қана Қазақстанның мүддесін қорғау. Ресей мен Батыс арасында санкциялық соғыс жүріп жатыр. Қысым жасалуда. Осындай жағдайда Ресей үшін Батысқа терезені кім ашып жатыр? Ол – біз. Ресейден қаншама азамат шетелге қашты. Олар қайда барып пана тапты? Әрине, бізге келді. Ешқандай кедергі жасаған жоқпыз. Жағдайын жасадық. Оларды кіргізбесек, Ресей үлкен проблемаға тап болатын еді. Солтүстік көршімізбен қарым-қатынасымыз жақсы. Қаласақ та, қаламасақ та, біз де, олар да, бір-бірімізден қашып құтыла алмаймыз. Тоқаевқа басты қауіп сырттан емес, іштен болмақ.  Тоқаев сайлаудан кейін барлық өкілеттілікті өзіне алып, кадрлық шешім қабылдауы керек. Былайша айтқанда, қауіпсіздік құрылымдарына жаңа адамдарды әкелуі тиіс. Мұндай қажеттілік бар екенін қаңтар бүлігі көрсетті. Жаппай шеру ұйымдастыру үшін мол ақша керек. Мол ақша кімде бар? Бұрын билікте болған адамдар да бар. Қаңтарда олар реванш алғысы келді. Қазақстанның бүкіл байлығы 162 адамның ғана қолында. Тоқаевқа ең бірінші қауіп-қатер осы олигархтардан»,– деген пікір білдірді.

 

Ермек Сахариев
28.11.2022

Ұқсас жаңалықтар

ТҮРКІСТАНДА ТҰРҒЫН ҮЙ САЛАСЫНА БАҒЫТТАЛҒАН ИНВЕСТИЦИЯ КӨЛЕМІ АРТТЫ
Түркістан облысы әкімінің баспасөз қызметі - 27.01.2023 376
ТҮРКІСТАНДА ОБЛЫС БАСШЫЛЫҒЫ МЕН ЖЫЛЫЖАЙ ИЕЛЕРІ БАС ҚОСТЫ
Түркістан облысы әкімінің баспасөз қызметі - 27.01.2023 339

Топ жаңалықтар

1
ТҮРКІСТАНДА «ӘЙЕЛДЕР КӘСІПКЕРЛІГІН ДАМЫТУ – АЙМАҚТЫ ДАМЫТУ» ТАҚЫРЫБЫНДА ДӨҢГЕЛЕК ҮСТЕЛ ӨТТІ
Show more
Түркістан облысы әкімінің баспасөз қызметі - 2023-01-28 298
2
ТҮРКІСТАН ОБЛЫСЫНДАҒЫ БАРЛЫҚ ЕЛДІ МЕКЕНДЕРДІ КӨГАЛДАНДЫРУ ЖҰМЫСЫ ЖАНДАНАДЫ
Show more
Түркістан облысы әкімінің баспасөз қызметі - 2023-01-28 297
3
Елнұр Бейсенбаев: "Сайлауалды бағдарламаға ұсыныстар халықтан тікелей жиналады"
Show more
«AMANAT» партиясының баспасөз қызметі - 2023-01-28 295
4
ТҮРКІСТАН ОБЛЫСЫНДА ИНВЕСТИЦИЯЛЫҚ ШТАБ ЖҰМЫСЫН БАСТАДЫ
Show more
Түркістан облысы әкімінің баспасөз қызметі - 2023-01-28 299
5
Қарағанды облысы Аймақта 32 ауылдың жағдайы жақсарады
Show more
Ермек Сахариев - 2023-01-26 122