Шымкенттік мақтаулы мұғалімдер саны жылдан жылға артып келеді. Әсіресе, еліміз өз Тәуелсіздігін жариялаған 30 жылы ішінде Шымкент қаласының білім саласы айтулы жетістіктерге қол жеткізуде. Қаланың білім беру ұйымдарында бүгінде 28 702 педагог жұмыс істейді. Олардың жалақысы 2020-2021 жылдары 50 пайызға артса, 2022 жылы тағы 25 пайызға көбеймек.
Кешегі апта соңында «Ұстаздар күні» мерекесіне арналған салтанатты шарада «Үздік педагог – 2021» байқауының жеңімпаздары марапатталды.
Шымкент қаласы әкімінің бірінші орынбасары Шыңғыс Мұқан, қалалық мәслихаттың хатшысы Бахадыр Нарымбетов ұстаздар қауымын кәсіби мерекемен құттықтап, байқауда үздік деп танылған педагогтарды марапаттады. Еске алсақ, 2021 жылдың 26-28 мамыр күндері педагогтерге арналған «Үздік педагог» конкурсының қалалық кезеңі өткізілген болатын. Қорытындыға сәйкес, «Үздік педагог» байқауының іріктеу кезеңінде 21 ұстаз жеңімпаз атанды. Үш педагог 27-29 қыркүйек күндері Қостанай қаласында өткен республикалық конкурста үздік деп танылды.
Шыңғыс Жұмабекұлы байқау жеңімпаздарына Алғыс хат және қаржылай сертификат табыс етті.
– «Мемлекет басшысы ұстаздардың ағартушылық қызметі, жас буынды тәрбиелеу жолындағы тынымсыз еңбегі қашан да жоғары бағаланатынын айтты. Конкурс қорытындысы бойынша жеңімпаздарға қаланың «Үздік педагог» атағы беріліп, айлық есептік көрсеткіштің 300 еселенген (875100 теңге) мөлшерінде сыйақы төленеді. Республикалық конкурстың жеңімпаздары «Үздік педагог» атағымен марапатталып, «Педагог мәртебесі туралы» Заңда көрсетілген тәртіпте сыйақы төленеді. Жеңістеріңіз құтты болсын, ұстаздар! Кәсіби мерекелеріңізде мерейлеріңіз арта берсін!» – деді қала әкімінің бірінші орынбасары құттықтау сөзінде.
Қала педагогтері «Үздік педагог» атағын беру қағидаларының ерекшеліктері бойынша жыл бойы әдістемелік орталық қызметкерлерімен бірлесе жүйелі түрде жұмыстар жүргізді. Байқаудың қалалық кезеңінде Жол-көлік, Саз, индустриалды-техникалық колледждің, мектептердің және балабақшалардың ұстаздары өз біліктілігін байқатты. Республикалық кезеңде №122 «Ақжар» жалпы орта мектебінің тарих пәні мұғалімі Ш.Бегманова, М.Х.Дулати атындағы үш тілде оқытатын мамандандырылған №8 гимназияның математика пәні мұғалімі Т.Харченко, №1 дарынды балаларға арналған ІТ лицей-интернатының биология пәні мұғалімі Ә.Тұрышова жеңімпаз атанды.
