ҚР Еңбек және халықты әлеуметтік қорғау вице-министрі Ербол Оспанов Түркістан облысына жұмыс сапары аясында өңірдегі бірқатар әлеуметтік мекемелердің жұмысымен танысып, әлеуметтік қызметкерлермен және Түркістан тұрғындарымен кездесулер өткізді, онда әлеуметтік-еңбек саласындағы жаңалықтар туралы хабарлады. Вице-министр Түркістандағы жұмыс сапарын биыл пайдалануға берілген «Қамқорлық» жанұя орталығының жұмысымен танысудан бастады.
Одан соң Ербол Оспанов әлеуметтік қызметкерлермен кездесу өткізіп, онда Әлеуметтік кодексті іске асыру шеңберінде көзделген әлеуметтік қызмет көрсету жүйесін жаңғырту туралы айтты.
— Бұл жұмыстың негізгі мақсаты – арнаулы әлеуметтік қызметтердің, әсіресе мүгедектігі бар адамдар үшін қолжетімділігін арттыру. Ол бірнеше бағытты көздейді, атап айтқанда: халықтың арнаулы әлеуметтік қызметтерге қажеттілігі азаматтардың өтінішін күтпей, Отбасының цифрлық картасының көмегімен автоматты түрде айқындалатын болады; әлеуметтік қызмет көрсету ұйымдарын шағындап қайта ұйымдастыру және қызмет алушылардың тұрғылықты жері бойынша сыйымдылығы шағын үйлерде арнаулы әлеуметтік қызметтер көрсету; мүгедектігі бар адамдарға қызмет көрсетуге отбасы мүшелерін тарту; арнаулы әлеуметтік қызметтер стандарттарын қайта қарау және әлеуметтік қызмет көрсету саласында тариф қалыптастырудың жаңа тәсілдерін енгізу, – деді вице-министр.
Ербол Оспанов Отбасының цифрлық картасының (бұдан әрі – ОЦК) жұмыс принциптеріне егжей-тегжейлі тоқталды.
— ОЦК еліміздің барлық отбасылары туралы мемлекеттік органдардың ақпараттық жүйелеріндегі деректерді қамтиды. Оны енгізудің негізгі мақсаты қазақстандықтардың мемлекеттік қолдау жүйесіне тең қолжетімділігін қамтамасыз ету болып табылады. Бұл ретте қолда бар деректерді автоматты өңдеудің арқасында кімге, қашан, қандай көмек қажет екенін анықтап қана қоймай, әлеуметтік тәуекелдердің алдын алу шараларын да қарастыруға болады, – деп бөлісті Ербол Оспанов.
Сонымен қатар ол ОЦК халық үшін белгілі бір мемлекеттік қызметтердің қолжетімділігі туралы хабарлама болып табылатынын атап өтті.
— Тиісті қолдау шаралары SMS-хабарлама арқылы хабарланады, оған жауап бере отырып, көрсетілетін қызметті алушы қосымша өтініштерсіз немесе мемлекеттік мекемелерге бармай-ақ қызметті алуға автоматты түрде келіседі. Бұл қызмет көрсетудің проактивті форматын жүзеге асыруға мүмкіндік береді, – деді вице-министр.
Бұдан басқа, Ербол Оспанов әлеуметтік қызметкердің мәртебесін көтеру бойынша жүргізіліп жатқан жұмыстар туралы айтты.
— Әлеуметтік кодексті іске асыру шеңберінде әлеуметтік қызметкерлерге санаттар бере отырып оқыту және одан әрі сертификаттау көзделген. Ал 2025 жылдан бастап олардың кәсіби деңгейі мен орындалатын жұмыстардың күрделілігін ескере отырып, еңбекақы төлеудің жаңа жүйесі енгізілетін болады, – деп қорытындылады ол. Әлеуметтік қызметкерлермен кездесуден соң Ербол Оспанов Сауран ауданындағы оңалту орталығына барып, ұйымның жұмысымен танысты.
Сапар аясында вице-министр Түркістан қаласының тұрғындарымен кездесу өткізеді, оған 200-ге жуық адам қатысады. Ербол Оспанов Әлеуметтік кодексте көзделген шараларды іске асыру, әлеуметтік-еңбек саласын одан әрі дамыту туралы айтып, азаматтарды қызықтыратын мәселелерді талқылайды.
