Орал қаласындағы жаңа шағын аудан – «Ақжайықта» тұрғын үй құрылысы қарқынды жүргізілуде. Жалпы болашақта 50 мың адам осы ауданның тұрғынына айналады деген жоспар бар.
Қала іргесіндегі «Ақжайық» шағын ауданының құрылысы 2021 жылы басталған болатын. Негізінен, мұнда алғашқы кезеңде 3559 пәтерлі 25 көпқабатты тұрғын үй салу жоспарланған. Биыл 8 көпқабатты үй пайдалануға беріліп, 400-ге тарта отбасы баспаналы болған. Бұл үйлердің қатары әлі де толығу үстінде. Айталық, 370 пәтерлік үш тұрғын үй өз иелерін күтіп тұрса, тағы тоғыз қабатты екі үйдің құрылысы жүргізілуде. Сондай-ақ «Ақжайық» ауданына инженерлік-коммуникациялық инфрақұрылым жүргізіліп, жаңадан кәріз стансасы салынған. Шағын ауданған ішкіорам жолдарының инфрақұрылымы жүргізілген. Бұл жұмыстар ел Президентінің халықтың әл-ауқатын арттырып, баспанамен қамту туралы тапсырмасы аясында қолға алынуда.
Жуырда Батыс Қазақстан облысына Мемлекет басшысының тапсырмаларының орындалу барысын бақылап, халықтың әл-ауқаты мен мұқтаждықтарын саралау мақсатындағы жұмыс сапарымен келген ҚР Парламенті Мәжілісінің депутаты Бақтықожа Ізмұхамбетов те «Ақжайық» шағын ауданында болып, мұндай жаңа аудандардың салынуы халықтың тұрмысын жақсартуға бағытталған нақты қадам екенін атап өткен еді.
Сонымен қатар «Ақжайық» шағынауданында алдағы уақытта 1500 орындық үш мектеп, 500 орындық үш балабақша, 60-қа жуық әлеуметтік нысан салынады деп күтілуде. Әзірге бұл ауданда мүгедектігі бар адамдарға арналған 150 орындық «Ақжайық» оңалту орталығы жұмыс жасауда. Бұлардан бөлек бос жер телімдеріне аукцион ойнатылып, кәсіпкерлерге сауда нысандарын ашуға мүмкіндік берілуде. Оған қоса жаңа ауданда заманауи талаптарға сай инженерлік желілер, абаттандырылған аулалар мен демалыс аймақтары да қарастырылмақ. Облыс орталығын көркейтіп, халықтың тұрмысын жақсарту – күн тәртібіндегі маңызды істердің бірі. Бұл бағытта түрлі ауқымды жобалар жүзеге асырылып, айшықты істер атқарылуда. Солардың қатарындағы «Ақжайық» шағынауданының да тынысы одан әрі кеңейіп, зәулім ғимараттар мен сапалы нысандар қатары көбейіп, халық игілігіне қызмет етері сөзсіз.
