37 жылу электр орталығының 10-ы ғана мемлекет меншігінде

ҚР Энергетика министрлігі: «Елімізде 37 жылу электр орталығы бар. Ведомство тізіміндегі 37 жылу электр орталығының 10-ы мемлекет меншігіне тиесілі. Ал бесеуіне квазимемлекеттік сектор иелік етіп отыр. Қалған 22 жылу электр орталығы – жекеменшік. Мемлекеттік ЖЭО-лар Астана, Шахтинск, Арқалық, Тараз, Семей, Қостанай, Орал, Кентау, Қызылорда қалаларында, квазимемлекеттік сектор иелігіндегі ЖЭО-ның үшеуі Алматыда, ал екеуі Ақтауда орналасқан. Қалған өңірлердегі орталықтар жекеменшіктің қолында», – деп хабарлайды.  Айта кетерлігі, еліміздегі жылу электр орталықтарының орташа жұмыс істеген мерзімі 61 жыл. ЖЭО-лардың 76 пайызға жуығы 50 жылдан астам уақыт бойы халыққа қызмет көрсетіп келеді. ЖЭО-ның негізгі жабдықтарының орташа тозуы – 66 пайыз. 37 жылу электр орталығының жалпы электр қуаты – 6 517 МВт, ал жылу қуаты – 20 135 Гкал/сағат. Аталған орталықтарда 190 бу қазандығы, 41 су жылыту қазандығы, 132 бу турбинасы және 5 газ турбинасы жұмыс істейді.