Жуырда ҚР Үкіметінің ресми сайтында Премьер-министрдің бірінші орынбасары Роман Склярдың Германияның танымал кәсіпорны CLAAS GROUP компаниясының бас директоры Ян-Хендрик Мормен кездесу өткізгендігі туралы «Үкіметте елімізде ауылшаруашылығы техникасын өндіру мәселелері талқыланды» атты хабар жарық көрді.
«Кездесуде тараптар Солтүстік Қазақстан облысындағы CLAAS ауылшаруашылығы техникасын шығаратын бірлескен кәсіпорын жұмысының өзекті мәселелерін талқылады. Роман Скляр жергілікті өндірушілерді жаһандық жеткізу тізбегіне енгізу, оқшаулауды тереңдету, өндіріс көрсеткіштерін арттыру және шығарылатын өнім номенклатурасын кеңейту бойынша жұмыстарды жалғастырудың маңыздылығын атап өтті. Сондай-ақ кездесу барысында ауылшаруашылығы техникасын шығару және тығыз кооперациялық байланыстарды одан әрі дамыту саласындағы бірқатар мәселелер талқыланды», – делінген. Естеріңізде болса, 2021 жылы ауылшаруашылығы техникасын шығару бойынша әлемдегі көшбасшы компания саналатын «CLAAS» концерні СҚО-да зауыт салатындығы туралы хабарланған еді. Сол тұстағы облыс әкімі Құмар Ақсақалов «Компанияның бүкіл әлем бойынша 7 зауыты бар: Германия, Франция, АҚШ, Қытай, Ресей, Венгрия және Өзбекстанда. Сегізінші зауыт Солтүстік Қазақстан облысында ашылады. Бұл неміс әріптестерімен ұзақ, бірақ сәтті келіссөздердің нәтижесі», – деп сендірген болатын. Біздің елде ауылшаруашылығы техникаларын жаңарту мәселесіне қатысты министрліктер мен Үкімет бас қатырып келе жатқандығына талай уақыт өтті. Өкінішке қарай, бір мезгіл қабылданған бағдарламалар шаруаларға мүлде тиімсіз болып шыққаны бар. Айналып келіп мемлекетке алақан жаюға көшкен бұл бағдарламалардың біртіндеп үні өшкен. Ал одан кейінгі бір шешім қажетті техникаларды елімізде құрастыру, сол арқылы өнімнің өзіндік құнын төмендетуге талпыныстар жасалғаны бар. 2023 жылы 1 қыркүйекте Мемлекет басшысы Қасым-Жомарт Тоқаев «Әділетті Қазақстанның экономикалық бағдары» атты Қазақстан халқына Жолдауында бұл салаға арнайы тоқтала келіп: «Ауыл аманаты» бағдарламасының елге қажет екені айқын көрінді. Оның келесі кезеңінде жеңілдетілген несие берумен шектеліп қалмау керек. Жеке қосалқы шаруашылық иелері өзара бірігуі қажет. Осыған қажетті жағдай жасалуға тиіс. Машина-трактор паркінің әбден ескіріп, тозуы күрделі мәселеге айналды. Қазір ауылшаруашылығы техникасының 80 пайызы тозып тұр. Сондықтан жыл сайын оның 8-10 пайызын жаңартып отыру қажет. Бұл ретте еліміздегі техника өндірушілер мен шаруалардың да мүддесін ескерген абзал», – деген еді.
Өкінішке қарай, кейбір мамандар Президенттің осы маңызды тапсырмасының тым баяу жүзеге асып жатқанын айтып отыр. Олардың мөлшерлеуінше, қазір жыл сайын ауылшаруашылығы техникасының 2-3 пайызы ғана жаңартылып жатыр екен. Осындай олқылықтардың орнын толтыруға бұл кәсіпорындардың қаншалықты қауқарлы екендігі алдағы күннің еншісінде болмақ.
Ерқазы СЕЙТҚАЛИ
